Սեպտեմբերի 2-ին Սկոպյեի Տոդոր Պրոյեսկու մարզադաշտում կկայանա 2022 թ. Ֆուտբոլի աշխարհի առաջնության ընտրական J խմբի չորրորդ տուրի Հյուսիսային Մակեդոնիա-Հայաստան հանդիպումը:
Հանդիպման գլխավոր մրցավար է նշանակվել պորտուգալացի Արթուր Դիասը։ Նրան կօգնեն հայրենակիցները՝ Ռուի Տավարեսը և Պաոլո Սուարեսը: Պահեստային դատավորը Ժոաո Պինեյրոն է: Այս մասին հայտնում է Հայաստանի ֆուտբոլի ֆեդերացիայի մամուլի ծառայությունը:
Նախօրեին ազգային հավաքականին միացան հարձակվող Իշխան Գելոյանը, դարպասապահ Ստանիսլավ Բուչնևը և կիսապաշտպան Արտեմ Ավանեսյանը: Նույն օրը թիմը հերթական մարզումն անցկացրեց Գերչե Պետրովի անվան մարզադաշտում:
Սեպտեմբերի 1-ին Հայաստանի հավաքականը նախախաղային մարզում կանցկացնի Տոդոր Պրոյեսկի մարզադաշտում:
Հիշեցնենք, որ Հայաստանի հավաքականը երեք տուրից հետո 9 միավորով առաջատարն է J խմբում: Սեպտեմբերի 2-ին կկայանան նաև Իսլանդիա-Ռումինիա և Լիխտենշտեյն-Գերմանիա հանդիպումները:
