Ֆուտբոլի միջազգային ֆեդերացիան (ՖԻՖԱ) Գերմանիայի «Բավարիայի» լեհ հարձակվող Ռոբերտ Լևանդովսկուն ճանաչել է 2021 թվականի լավագույն ֆուտբոլիստ: Նա առաջ է անցել «Պարի Սեն Ժերմենի» արգենտինացի հարձակվող Լիոնել Մեսիից։
Մրցանակաբաշխությունը կայացել է առցանց ձևաչափով:
«Շնորհակալություն պարգևի և շնորհավորանքների համար: Ինձ համար այս մրցույթում հաղթելը պատիվ է։ Հիմա ես հպարտություն ու երջանկություն եմ զգում։ Այս մրցանակը պատկանում է նաև իմ գործընկերներին և մարզիչներին, քանի որ մենք բոլորս միասին ջանասիրաբար աշխատել ենք այն նվաճելու համար»,- ասել է Լևանդովսկին։
ՖԻՖԱ-ի վարկածով Տարվա լավագույն խաղացողի մրցանակը որոշվում է լրագրողների, գլխավոր մարզիչների և ազգային թիմերի ավագների միջազգային քվեարկության միջոցով: Քվեարկության արդյունքում Լևանդովսկին հավաքել է 48 միավոր, Մեսսին՝ 44։ Եռյակը եզրափակել է անգլիական «Լիվերպուլի» եգիպտացի հարձակվող Մոհամեդ Սալահը։
