VNews-ը «Սամպդորիա» «Ռոմա» խաղից հետո բացառիկ հարցազրույց է անցկացրել ֆուտբոլի Հայաստանի ազգային հավաքականի նախկին ավագ, Հռոմի «Ռոմայի» կիսապաշտպան Հենրիխ Մխիթարյանի հետ: Խաղում հաղթական գոլի հեղինակ դառնալուց հետո Մխիթարյանը լրատվականի հետ խոսել է հանդիպման, մրցաշրջանի մնացած հատվածի, «Ռոմայի» հետ պայմանագրի ժամկետը հնարավոր թարմացնելու և հավաքականում խաղակոշիկները մեխից կախելու մասին:
Մխիթարյանը շնորհակալություն է հայտնել շնորհավորանքի համար։
«Հավանաբար, նկատել եք, որ այս տարի հիմնականում խաղում եմ կիսապաշտպանության ավելի ներքևի հատվածում. փակում եմ հենակետային կիսապաշտպանի գոտին։ Բայց վերջին խաղերում նորից դիրքս փոխել եմ. խաղում եմ ենթահարձակվողի գոտում, քանի որ մարզիչը մի փոքր փոխել է թիմի սխեման։ Այս պարագայում էական չէ դիրքը. կարևորը՝ թիմին օգնեմ ամեն խաղում հաղթանակ տոնելու հարցում»,- ասել է նա։
2022 թվականին «Ռոման» ընդամենը 3 պարտություն է կրել ու անհամեմատ ավելի վստահ է ելույթ ունենում՝ նախորդ տարվա վերջին ամիսների համեմատ։ Հարցին, թե ինչի՞ հաշվին է թիմն ուժեղացել, ո՞րն է նման ցուցանիշի գաղտնիքը, Մխիթարյանը պատասխանել է։
«Կարծում եմ՝ ի տարբերություն մրցաշրջանի առաջին հատվածի՝ թիմն ու տղաներն ավելի փորձառու են դարձել։ Ժամանակի ընթացքում սովորել ենք միմյանց, հիմա արդեն գիտենք՝ ով որտեղ է լինելու հաջորդ պահին, սովորել ենք միասին գրոհել ու պաշտպանվել։ Բնականաբար, չէր կարող հեշտ լինել, քանի որ նոր մարզչի հետ ենք աշխատում, մի շարք ֆուտբոլիստներ հեռացան, նրանց փոխարեն եկան նորերը։ Խաղ կառուցելու համար ժամանակ է անհրաժեշտ, ու այդ ընթացքում կարող են պատահել սայթաքումներ, բայց հիմա թիմը լավ վիճակում է։ Բայց առաջ չեմ ուզում ընկնել. դեռ 2 ամիս ունենք, առջևում բազում խաղեր կան։ Մենք հիմա մտածում ենք միայն հաջորդ խաղի մասին. հեռուն չենք նայում։ Միայն մրցաշրջանի վերջում կերևա՝ ինչպես ենք մենք աշխատել և ուր ենք հասել»։
Ֆուտբոլիստը հայտնել է, որ իրեն հիանալի է զգում «Ռոմայում», իրեն անչափ դուր է գալիս Հռոմը, երկրպագուները հրաշալի են, շնորհակալ է նրանց ջերմ վերաբերմունքի համար։
Միջազգային կարիերան ավարտելու մասին սպորտսմենն ասել է, որ հիմա պետք է հաշվի նստել այդ որոշման հետ։
«Ինձ համար հեշտ չէ, սակայն ես գիտեմ, որ շատ բան եմ արել իմ երկրի ու Հայաստանի հավաքականի համար։ Հիմա ժամանակն է, որ այդ ճանապարհն անցնեն երիտասարդները։ Հայաստանի հավաքականը պետք է խաղա աշխարհի կամ Եվրոպայի առաջնության եզրափակիչ փուլերում։ Հիմա հերթը երիտասարդ տղաներինն է՝ հավաքականն այդ երազանքի հետևից տանելու համար։ Ես հավատում եմ նրանց ուժերին։ Մենք ունենք լավ սերունդ, ես նրանց հաջողություն եմ ցանկանում ու կարծում եմ, որ նրանք կհասնեն այդ նպատակին»,- ասել է նա։