Երևանում կայանալիք բռնցքամարտի Եվրոպայի առաջնությանը հետևելու համար Հայաստան է ժամանել բռնցքամարտի միջազգային ֆեդերացիայի (IBA) նախագահ Ումար Կրեմյովը։ Բռնցքամարտի միջազգային կառույցի նախագահին օդանավակայանում դիմավորել է Հայաստանի ֆեդերացիայի նախագահ Հովհաննես Հովսեփյանը: Այս մասին հայտնում էն Հայաստանի բռնցքամարտի ֆեդերացիայից:
Հիշեցնենք, որ Եվրոպայի առաջնության բացման հանդիսավոր արարողությունը կկայանա այսօր՝ մայիսի 22-ին, ժամը 21:00-ին: Կազմակերպիչները հանդիսականներին ավելի վաղ հորդորել են Կարեն Դեմիրճյանի անվան մարզահամերգային համալիրում լինել արդեն 20:20-ից, քանի որ դրանից հետո երկրպագուների տեղաշարժը սահմանափակվելու է:
Նշենք, որ Եվրոպայի առաջնությունը կանցկացվի մայիսի 21-31-ը Կարեն Դեմիրճյանի անվան մարզահամերգային համալիրում։ Հայաստան կժամանի մոտավորապես 280 բռնցքամարտիկ:
Եվրոպայի առաջնության ընդհանուր մրցանակային ֆոնդը կազմում է 260 հազար դոլար: Հայաստանը ներկայացուցիչներ կունենա բոլոր 13 քաշային կարգերում: Մեր երկրի մարզական պատիվը կպաշտպանեն Բարեղամ Հարությունյանը (48 կգ), Արթուր Հովհաննիսյանը (51 կգ), Ջանիկ Սահակյանը (54 կգ), Արթուր Բազեյանը (57 կգ), Կարեն Տոնականյանը (60 կգ), Հովհաննես Բաչկովը (63,5 կգ), Գուրգեն Մադոյանը (67 կգ), Նարեկ Զախարյանը (71 կգ), Վախթանգ Հարությունյանը (75 կգ), Համբարձում Հակոբյանը (80 կգ), Ռաֆայել Հովհաննիսյանը (86 կգ), Նարեկ Մանասյանը (92 կգ) և գերծանր քաշային Դավիթ Չալոյանը:
