ԵԽԽՎ այսօրվա նիստում Ադրբեջանում գտնվող հայ ռազմագերիների և գերիների վերադարձի վերաբերյալ հարցի հրատապ կարգով քննարկումը մերժվել է։ Այս մասին փոխանցում է ТАСС-ը։
Նիստի մասնակիցները ձմեռային նստաշրջանի օրակարգի հաստատման ընթացքում մերժել են այդ քննարկումները շտապ կարգով անցկացնելու խնդրանքը։
Առաջին նիստի ընթացքում մերժվել են հրատապ բանավեճերի անցկացումը նաև մի շարք այլ թեմաներով՝ Բելառուսում տիրող իրադրության վերաբերյալ, կորոնավիրուսի պանդեմիայի շրջանում Ղրիմում մարդու իրավունքների պաշտպանության, ինչպես նաև Գերմանիայից Ռուսաստան ժամանելուց հետո Ալեքսեյ Նավալնիի ձերբակալության հարցերը:
Նշենք, որ Եվրոպայի խորհրդի խորհրդարանական վեհաժողովը 2021 թվականի ձմեռային նստաշրջանն անցկացնելու է հունվարի 25-28-ը։
