Ֆրանսիայի Լիլլի համալսարանի գիտնականները սարք են ստեղծել, որը մարդկանց հնարավորություն է տալիս սմարթֆոնով կորոնավիրուս հայտնաբերել, հաղորդում է France Info տեղական ռադիոկայանը:
Ինչպես ներկայացրել է սարքը մշակող դասախոսներից մեկը՝ Սաբինա Շուներիցը, սարքը նման է USB կրիչի: Այն պետք է միացնել սմարթֆոնին, այնուհետև այնտեղ տեղադրել կենսանյութերով փոքր փորձարկման ժապավեն:
10 րոպե անց արդյունքը կհայտնվի էկրանին: Ըստ նրա՝ դեռևս կենսազննումը կիրականացնի մասնագետը: Ներկայում գիտնականները փորձում են կատարելագործել սարքը, որպեսզի զննումը հնարավոր լինի իրականացնել թքի միջոցով:
Ինչպես նշել է պրոֆեսորը, սարքի ցույց տված արդյունքներն արդեն 88%-ով համընկնում են PCR թեստերով տրված արդյունքների հետ: Տեխնոլոգիան հասանելի կլինի մի քանի շաբաթից:
Գիտնականներն իրենց ստեղծած սարքը դեռևս չեն ներկայացրել Ֆրանսիայի կառավարությանը: Այժմ լաբորատորիան շաբաթական արտադրում է մոտ 1000 սարք:
