Շնորհավորական ուղերձ եմ հղել ԱՄՆ պետքարտուղար Էնթոնի Բլինկենին` Միացյալ Նահանգների անկախության 245 ամյակի կապակցությամբ։ Ֆեյսբուքյան իր էջում գրել է ՀՀ փոխվարչապետի պաշտոնակատար Տիգրան Ավինյանը։
«Հուլիսի 4-ը միշտ եղել է ոչ միայն տոն, այլ նաև հիշատակի օր, երբ միլիոնավոր ամերիկացիներ հարգանքի տուրք են մատուցում ազատությանը` ոգեկոչելով ազատության ճանապարհին կատարված զոհաբերությունները: Հենց այս ոգին էր, որ Ամերիկայի ժողովրդին դրդեց համագործակցել այլ ժողովուրդների հետ և սատարել բարեկեցիկ ապագայի նրանց ձգտումները:
Մի քանի ամիս անց Հայաստանը և Միացյալ Նահանգները կնշեն դիվանագիտական հարաբերությունների 30-ամյակը, և այս համատեքստում ես կցանկանայի իմ գնահատանքն արտահայտնել վերջին երեք տասնամյակների ընթացքում Միացյալ Նահանգների կառավարության կողմից մեր երիտասարդ ժողովրդավարությանը տրամադրված շարունակական աջակցության համար: Ընդհանուր արժեքային համակարգն այն հենքն է, որի վրա խարսխված են մեր հարաբերությունները:
Ամերիկայի Միացյալ Նահանգները Հայաստանի համար միշտ կարևոր գործընկեր է եղել անվտանգային հարցերում: Որպես ԵԱՀԿ Մինսկի խմբի համանախագահ` ԱՄՆ-ի հանձնառությունը չափազանց կարևոր է մեզ համար. հատկապես այժմ, երբ մեր առջև դեռևս ծառացած են նախորդ տարի Լեռնային Ղարաբաղի հակամարտության համատեքստում ուժի կիրառման ծանր հետևանքները:
Ակնկալում ենք, որ Միացյալ Նահանգները նոր ջանքեր կգործադրի ԵԱՀԿ Մինսկի խմբի համանախագահության ձևաչափում Լեռնային Ղարաբաղի հիմնախնդրի արդարացի և համապարփակ կարգավորման ուղղությամբ` ելնելով հանրահռչակ սկզբունքներից. այն է ` հավասար իրավունքներ բոլորի համար և ժողովուրդների ինքնորոշում:
Թույլ տվեք մեկ անգամ ևս շնորհավորել Ձեզ Անկախության օրվա կապակցությամբ` մաղթելով Ձեզ և բոլոր ամերիկացիներին ուրախ տոն»,-նշվում է Ավինյանի գրառման մեջ: