Ամերիկյան ուժերը կիրակի օրը անօդաչու թռչող սարքից Քաբուլում հարված են հասցրել՝ ոչնչացնելով պայթուցիկով ավտոմեքենան, որի օգնությամբ մտադիր էին ահաբեկչություն իրականացնել «Խորասանում Իսլամական պետություն» խմբավորման գրոհայինները, որը «Իսլամական պետություն» ծայրահեղական կազմակերպության ճյուղն է: Այս մասին ասվում է ԱՄՆ ԶՈՒ կենտրոնական հրամանատարության ներկայացուցիչ Ուիլյամ Ուրբանի հայտարարության մեջ։
«ԱՄՆ-ի ուժերն այսօր ինքնապաշտպանական նպատակներով անօդաչու թռչող սարքից ավիահարվածներ են իրականացրել Քաբուլում՝ վերացնելով «Խորասանում Իսլամական պետության» կողմից անմիջական սպառնալիքը Համիդ Քարզայի անվան օդանավակայանի նկատմամբ»,- նշվում է փաստաթղթում:
«Մենք վստահ ենք, որ հաջողությամբ խոցել ենք նպատակակետը»,- ընդգծել է Ուրբանը: Ինչպես ճշտվում է հայտարարության մեջ, ավտոմեքենային հարվածելուց հետո հաջորդել են «երկրորդական պայթյունները»: ԱՄՆ-ի իշխանությունները կարծում են, որ դա վկայում է տրանսպորտային միջոցում «պայթուցիկ նյութերի զգալի ծավալի առկայության մասին»:
