Վաշինգտոնում «Reuters»-ին տված հարցազրույցում ԱՄՆ նախագահը հայտնել է, որ վստահ է՝ այնպիսի երկրներ, ինչպիսիք են Չինաստանը, Ռուսաստանը, Իրանը և Պակիստանը, կփորձեն համաձայնության գալ «Թալիբանի» հետ: Այս մասին հայտնում է parstoday.com-ը։
Թալիբներին Չինաստանի կողմից տրվելիք ֆինանսական աջակցության վերաբերյալ հարցին Բայդենն արձագանքել է՝ Չինաստանը լուրջ խնդիր ունի․
«Վստահ եմ, որ նրանք կփորձեն որոշակի համաձայնագրեր մշակել թալիբների հետ»:
«Պակիստանը, Ռուսաստանը, Իրանը՝ նույնպես: Նրանք բոլորը փորձում են պարզել՝ ինչ անել հիմա»,- նշել է ԱՄՆ նախագահը:
Աղբյուրը հիշեցնում է՝ ԱՄՆ-ն արգելափակել է Աֆղանստանի մուտքն իր արտարժութային պահուստներին, որոնց մեծ մասը պատկանում է Նյու Յորքի Դաշնային պահուստային բանկին:
Վաշինգտոնը պնդում է, որ այդ քայլը միտված էր ստիպելու թալիբներին կատարել իրենց պարտավորությունները, այդ թվում՝ հարգելու կանանց և միջազգային իրավունքները:
Թալիբանի խոսնակ Զաբիհուլլա Մուջահիդը երեքշաբթի երեկոյան հայտարարել էր, որ Աֆղանստանի կառավարության ժամանակավոր անդամներ են նշանակվել, և որ մոլլա Մոհամմադ Հասան Ահունդը դարձել է նախարարների կաբինետի ղեկավար և երկրի վարչապետի պաշտոնակատար:
ԱՄՆ-ը և տարածաշրջանի երկրները դեռ չեն ճանաչել «Թալիբանի» կառավարությունը:
