Ռուսաստանն ու Բելառուսը համաձայնության են եկել երկու երկրների միջև ներդրումային գործընթացների հետագա խորացման ուղղությամբ իրականացվելիք 28 ծրագրի շուրջ: Ինչպես հաղորդում է «Ինտերֆաքսը», այս մասին հայտարարել է Ռուսաստանի Դաշնության նախագահ Վլադիմիր Պուտինը Բելառուսի առաջնորդ Ալեքսանդր Լուկաշենկոյի հետ բանակցությունների արդյունքներից հետո:
«Այսօր ես կցանկանայի գոհունակությամբ նշել, որ բոլոր 28 ծրագրերը համաձայնեցված են»,- ասել է Պուտինը Լուկաշենկոյի հետ հանդիպումից հետո: Նա նշել է, որ մի քանի տարվա ընթացքում եռանդուն աշխատանք է տարվել փաստաթղթերի փաթեթի վրա՝ Ռուսաստանի և Բելառուսի միջև ներդրումային գործընթացները խորացնելու համար:
«Խոսքը 28, այսպես կոչված, միութենական ծրագրերի մասին է, որոնք ուղղված են տնտեսության տարբեր ոլորտներում Ռուսաստանի և Բելառուսի օրենսդրության միասնականացմանը, երկու երկրների տնտեսվարող սուբյեկտների գործունեության պայմանների համահարթեցմանը, ընդհանուր ֆինանսական և էներգետիկ շուկաների կառուցմանը»,- ասել է Պուտինը՝ հավելելով, որ վաղը նախատեսվում է դրանք հաստատել Մինսկում՝ Միութենական պետության նախարարների խորհրդի նիստում, որից հետո դրանք հաստատման կներկայացվեն:
Ալեքսանդր Լուկաշենկոն Պուտինի հետ բանակցություններից հետո լրագրողներին ասել է, որ բոլոր ծրագրերն ուղղված են երկու երկրների ժողովուրդների բարեկեցության բարձրացմանը:
«Պայմանավորվածություններ են ձեռք բերվել բելառուսական կողմի համար շատ զգայուն հարցերի շուրջ՝ կապված ռուսական էներգառեսուրսների գնագոյացման հետ: Երկար քննարկումների արդյունքում հնարավոր եղավ գազի հարցում փոխադարձ ընդունելի մոտեցումներ մշակել: Բելառուսի համար ռուսական բնական գազի գինը 2022 թվականի համար կպահպանվի ընթացիկ տարվա մակարդակով: Միևնույն ժամանակ, մինչև 2023 թվականի դեկտեմբերի 1-ը փաստաթուղթ կստորագրվի Միութենական պետության կազմում գազի միասնական շուկա ստեղծելու մասին»,- ասել է Լուկաշենկոն:
Բացի այդ, Վլադիմիր Պուտինը չի բացառել ապագայում Ռուսաստանի և Բելառուսի միութենական խորհրդարանի ստեղծումը: Նա նշել է, որ ներկայումս այդ հարցը չի քննարկվում և դեռ օրակարգում չէ:
Ալեքսանդր Լուկաշենկոն իր հերթին ասել է, որ չի բացառում Բելառուսի և Ռուսաստանի Դաշնության ընդհանուր արժույթի հարցին վերադառնալու հավանականությունը:
«Ինչ վերաբերում է միասնական արժույթին, ես ուզում եմ, որ դուք՝ լրագրողներդ, հասկանաք, որ հարցն այն չէ, որ Պուտինը կամ Լուկաշենկոն խոչընդոտում են այդ գործընթացները: Երբ մենք ուսումնասիրեցինք այս խնդիրը, Ռուսաստանի Կենտրոնական բանկը և մեր Ազգային բանկը միաձայն խնդրեցին դեռ չդիտարկել այդ հարցը: Նրանք ասացին, որ ո՛չ իրենք, ո՛չ մեր երկրները պատրաստ չեն դրան: Նախագահը և ես, լսելով դրանք, մի կողմ դրեցինք այս խնդիրը: Բայց դա չի նշանակում, որ մենք դրան չենք վերադառնա»,- ասել է Ալեքսանդր Լուկաշենկոն: