«Թալիբան» արմատական շարժումը չեղյալ է հայտարարել երկրի ժամանակավոր կառավարության երդմնակալության արարողությունը, որի մասին ավելի վաղ հայտարարել էր: Ինչպես հաղորդում է ՏԱՍՍ-ը, այսօր այս մասին ասել է «Թալիբանի» մշակույթի հանձնաժողովի անդամ Ինամուլլա Սամանգանին:
«Աֆղանստանի իսլամական էմիրության ղեկավարությունը հրապարակել է կաբինետի կազմի մի մասը միայն, որն արդեն սկսել է աշխատանքը»,- գրել է շարժման ներկայացուցիչը «Twitter»-ի իր էջում՝ չհստակեցնելով հետագայում երդմնակալության արարողության անցկացման հնարավորությունը: Բացի այդ, նա հերքել է նախկինում տարածված տեղեկություններն այն մասին, որ կառավարության երդմնակալությունը նախատեսված է սեպտեմբերի 11-ին՝ դրանք որակելով բամբասանք:
Ավելի վաղ մի շարք տեղական և արտասահմանյան լրատվամիջոցներ հայտնել էին, որ սեպտեմբերի 11-ին «Թալիբանը» ծրագրում է ժամանակավոր կառավարության երդմնակալությունը: Հաղորդվել էր, որ արարողությանը հրավիրված են Ռուսաստանի, Իրանի, Չինաստանի, Կատարի, Թուրքիայի և Պակիստանի ներկայացուցիչները: ՌԴ նախագահի խոսնակ Դմիտրի Պեսկովն այսօր հայտարարել է, որ Մոսկվան որևէ կերպ չի մասնակցի Աֆղանստանի նոր կառավարության երդմնակալության արարողությանը: