Գերմանիայի կառավարությունը կասեցնում է զենքի վաճառքը դեպի Թուրքիա՝ վերջինիս՝ Սիրիայի տարածքում նախաձեռնած ռազմական գործողությունների պատճառով: Այս մասին հայտնում է ՏԱՍՍ գործակալությունը՝ հղում կատարելով Գերմանիայի ԱԳ նախարար Հայկո Մաասի՝ Bild am Sonntag թերթին տված հարցազրույցում։
Սիրիայի հյուսիս-արևելքում թուրքական ուժերի ծավալած ռազմական գործողությունների պատճառով Գերմանիայի կառավարությունը հրաժարվում է նաև նոր թույլտվություններ տրամադրել ռազմական նշանակության բոլոր ապրանքների մատակարարումների համար, որոնք հետագայում Թուրքիան կարող է կիրառել Սիրիայում», – ասել է Գերմանիայի արտաքին գերատեսչության նախարարը։
Նախարարը հավելել է նաև, որ 2016 թ.-ից ի վեր Գերմանիայի կառավարությունը խիստ վերահսկողության տակ է պահում դեպի Թուրքիա զենքերի մատակարարման գործընթացը, ինչը նախարարը կապում է նաև նույն տարում Թուրքիայի կողմից դեպի Սիրիա լայնածավալ ռազմական ներխուժման դեպքի հետ։ Սակայն այն ժամանակ Գերմանիան ամբողջապես չէր դադարեցրել դեպի Թուրքիա զենքի վաճառքի գործընթացը։
ՏԱՍՍ գործակալությունը հայտնում է, որ 2019 թվականի առաջին չորս ամիսների ընթացքում Անկարան Գերմանիայից 184,1 մլն եվրո արժողությամբ սպառազինություն է գնել՝ գերմանական զենքի գնորդների ցանկում զբաղեցնելով առաջին հորիզոնականը:
2018 թվականին Գերմանիան Թուրքիային 242,8 մլն եվրոյի ռազմական ապրանքներ է մատակարարել, ինչը կազմել է սույն տարում սպառազինությունների գերմանական արտահանման գրեթե մեկ երրորդը (770,8 մլն եվրո):