Իրանը հարևան Իրաքի սահմանային գոտում հատուկ տեսախցիկներ է տեղադրել։ Այս մասին կիրակի հայտնում է ՏԱՍՍ գործակալությունը՝ հղում կատարելով Mehr իրանական գործակալությանը։
Աղբյուրը հայտնում է, որ Իրանի ցամաքային զորքերի համակարգողի տեղակալ, բրիգադի գեներալ Ալի Ջահանշահին հանդես է եկել հայտարարությամբ, ըստ որի, ելնելով սահմանային դիտարկման նպատակներից, տեսախցիկներ են տեղադրվել «հարևան պետության» հետ ընդհանուր սահմանին։ Ըստ զինվորականի՝ այս միջոցառումներն ուղղված են լինելու առավել արդյունավետ պաշտպանության ապահովմանը։
Ջահանշահին հավելել է նաև, որ տեղադրված տեսախցիկները հնարավորություն են ստեղծում ստացված ինֆորմացիան փոխանցել անօդաչու թռչող սարքերին, կվադրոկոպտերներին և այլ սարքավորումներին, որոնք մշտական հիմունքներով հետևում են սահմանամերձ գոտուն:
Զինվորականը հավելել է, որ տեսախցիկների տեղադրումը բխում է Իրանի՝ սահմանային անվտանգության ամրապնդման ընդհանուր քաղաքականությունից և նման միջոցառումներ ձեռք են առնվելու մոտ ապագայում նաև երկրի հարավարևմտյան և արևելյան սահմաններում:
Սակայն, ինչպես նշում է ՏԱՍՍ գործակալությունը, դեռևս հոկտեմբերի 3-ին Իրանը փակել է Իրաքի հետ սահմանի երկու հսկիչ-անցագրային կետեր ՝ այդ երկրում սկսված զանգվածային բողոքի ակցիաների պատճառով։
Եվ պատահականություն չէ այն հանգամանքը, որ անվտանգության ռեժիմի ապահովման այս միջոցառումները ձեռք են առնվել հենց այս սահմանային գոտուց։