Թուրքիայի նախագահ Ռեջեփ Թայիփ Էրդողանը հայկական հիմնադրամների միության նախագահ Բեդրոս Շիրինօղլուի հետ հանդիպման ժամանակ խոստացել է ընդունել նոր կանոններ, որոնք թույլ կտան Թուրքիայում փոքրամասնությունների կրոնական հիմնադրամներին ընտրել տնօրենների խորհուրդը, հաղորդում է Hurriyet Daily News-ը:
Պարբերականի տեղեկություններով՝ Էրդողանը հայտարարել է, որ նախապատրաստությունը կավարտվի մոտ ժամանակներս, և փոքրամասնությունների հիմնադրամներում կարող են ընտրություններ անցկացվել: Շիրինօղլուի խոսքով՝ Թուրքիայի նախագահը համապատասխան ցուցումներ է տվել մշակույթի նախարարությանը և հիմնադրամների գլխավոր վարչությանը։ Հայկական հիմնադրամների միության նախագահը կարծիք է հայտնել, որ այդ աշխատանքը կատարելու համար կպահանջվի 3-4 ամիս:
Պարբերականը նշում է, որ հիմնադրամների գլխավոր վարչությունը դադարեցրել է ընտրությունների անցկացումը 2013 թվականին: Փոքրամասնությունների հիմնադրամներում ընտրություններ չեն անցկացվում դրանց իրավական կարգավորման բացակայության պատճառով։
Ինչպես հաղորդում է ermenihaber.am-ը, Akşam թերթի հետ զրույցում Շիրինօղլուն հայտարարել է, որ Հայաստանի հետ հարաբերությունների թեման Էրդողանի հետ հանդիպման օրակարգում չի եղել ։ «Հայաստանի հետ հարաբերությունների թեման օրակարգում չի եղել։ Այս հարցն իր հունով է ընթանում, ինչպես բոլորը, մենք ուշադիր հետևում ենք իրադարձությունների զարգացմանը», – ասել է նա։
Հիշեցնենք, որ 2021 թվականի դեկտեմբերին ԱՄՆ Միջազգային կրոնական ազատության հանձնաժողովը (USCIRF) իր զեկույցում նշել էր, որ թուրքական կառավարությունը շարունակում է միջամտել կրոնական փոքրամասնությունների ներքին գործերին։ 2013 թվականից ի վեր Թուրքիայի կառավարությունն արգելել է կրոնական փոքրամասնությունների հիմնադրամներին ընտրել վարչության նոր անդամներին, ինչը հանգեցրել է նրանց թվի աստիճանական կրճատման, վատթարացրել է ամենօրյա գործունեության դժվարությունները եւ հանգեցրել համայնքների բաժանման:
