Թուրքիայի արդարադատության նախարար Բեքիր Բոզդաղը երեքշաբթի հայտարարել է, որ եթե Շվեդիան և Ֆինլանդիան չվերանայեն իրենց դիրքորոշումն ահաբեկչական կազմակերպություններին աջակցելու հարցում, ապա նրանք ՆԱՏՕ-ի անդամակցության նախապատրաստման աշխատանքների հետ կապված պարզապես «ժամանակ կկորցնեն»: ТАСС-ի փոխանցմամբ՝ այսպես է նա մեկնաբանել Թուրքիայի նախագահ Ռեջեփ Թայիփ Էրդողանի խոսքերն այն մասին, որ Անկարան չի կարող «այո» ասել Հյուսիսատլանտյան դաշինքին այդ երկու Սկանդինավյան երկրների անդամակցությանը։
«Եվրոպայի շատ երկրներ՝ Շվեդիայի գլխավորությամբ, աջակցություն են ցուցաբերում ահաբեկչական կազմակերպություններին»,- ասել է արդարադատության նախարարը՝ ելույթ ունենալով Անկարայում:
Բոզդաղի խոսքով՝ Անկարան իրատեսական դիրքորոշում ունի ՆԱՏՕ-ին Շվեդիայի և Ֆինլանդիայի անդամակցության հարցում: «Թուրքիան ճիշտ դիրքորոշում ունի»,- ասել է նախարարը՝ հիշեցնելով, որ Հյուսիսատլանտյան դաշինքը Թուրքիային ոչ մի օգնություն չի տրամադրել 1974 թվականին Կիպրոս զորքեր իջեցնելու գործողության ժամանակ, ինչպես նաև Սիրիայում ռազմական գործողությունների ժամանակ, բայց միևնույն ժամանակ «այսօր Ուկրաինային ամեն ինչ է տրամադրում»:
«1960-ականներից նրանք ամեն անգամ խոստացել են Եվրամիություն ընդունել այդ կառույցի շեմին կանգնած Թուրքիային, սակայն մշտապես փոխել են խաղի կանոնները՝ չնայած Թուրքիայի ստանձնած պարտավորությունների կատարմանը։ Ակնհայտ է Թուրքիայի հանդեպ կեղծավորության քաղաքականությունը»,- հայտարարել է նախարարը։
Թուրքիայի նախագահը մայիսի 16-ին հայտարարել է, որ չի կարող համաձայնել ՆԱՏՕ-ին Ֆինլանդիայի և Շվեդիայի անդամակցությանը՝ կապված այն բանի հետ, որ այդ երկու երկրները հրաժարվել են հանձնել Քրդստանի աշխատավորական կուսակցության գործունեությանը մասնակից անձանց։
