Հունաստանի ԱԳՆ-ն մերժել է Էգեյան ծովում հունական ինքնաթիռների կողմից իր օդային տարածքը խախտելու մասին Թուրքիայի հայտարարությունները և դրանք անհիմն է համարել: Այս մասին ասված է Հունաստանի արտաքին քաղաքական գերատեսչության տարածած հայտարարության մեջ, փոխանցում է ТАСС-ը:
Աթենքն ընդգծել է, որ այդ մեղադրանքները «Թուրքիայի հերթական փորձն են մոլորեցնելու և իր վրայից հանելու իրենց անօրինական և սադրիչ գործողությունների պատասխանատվությունը»: ԱԳՆ-ի խոսքով՝ «Հունաստանին մեղադրել այն երկրի դեմ սադրիչ գործողությունների մեջ, որը վերջերս Հունաստանի տարածքի վրայով ընդամենը մեկ օրում 42 թռիչք է կատարել և Հունաստանին սպառնում պատերազմով՝ ՄԱԿ-ի կանոնադրության հիմնարար սկզբունքների խախտմամբ, առնվազն պարադոքսալ է»:
Արտաքին քաղաքական գերատեսչությունը նշել է, որ Թուրքիան «հերթական անգամ իր գործողություններով խաթարում է տարածաշրջանային անվտանգությունն ու կայունությունը, ինչպես նաև ՆԱՏՕ-ի համախմբվածությունը կրիտիկական պահին»:
Գործակալությունը նշում է, որ մեկ օր առաջ Թուրքիան Հունաստանին մեղադրել էր Էգեյան ծովի իր օդային տարածքը խախտելու մեջ, մասնավորապես, 2022 թվականի մայիսի 16-ին Գեկչեադա կղզուց արևմուտք և 2022 թվականի մայիսի 17-ին Էնեսից արևմուտք: Նույն օրը Հունաստանի ԱԳՆ-ն դատապարտել է թուրքական կործանիչների կողմից օդային տարածքի խախտումը, որոնք մոտեցել են հունական Ալեքսանդրուպոլիս նավահանգստային քաղաքին 2,5 ծովային մղոն հեռավորության վրա, և վճռական բողոք է հայտնել Անկարային:
