ԱՄՆ պետքարտուղար Էնթոնի Բլինկենը և Թուրքիայի արտգործնախարար Մևլութ Չավուշօղլուն հեռախոսազրույց են ունեցել, քննարկել են ՆԱՏՕ-ի առաջիկա գագաթնաժողովին և Ուկրաինայի շուրջ ստեղծված իրավիճակին վերաբերող հարցեր: Interfax-ի փոխանցմամբ, այս մասին հայտնել է ԱՄՆ պետքարտուղարությունը:
«Պետքարտուղար Բլինկենը և ԱԳ նախարար Չավուշօղլուն քննարկել են ՆԱՏՕ-ի միասնության կարևորությունը՝ հունիսի 29-30-ը Մադրիդում կայանալիք դաշինքի գագաթնաժողովի նախաշեմին»,-ասված է հաղորդագրության մեջ:
Ավելի վաղ ԶԼՄ-ները հայտնել էին, որ գագաթնաժողովում կքննարկվի Ֆինլանդիայի և Շվեդիայի՝ ՆԱՏՕ-ին անդամակցելու հարցը, որոնք մայիսի 18-ին անդամակցության հայտ են ներկայացրել: Ներկայումս Թուրքիան շարունակում է արգելափակել հայտերի քննարկումը:
Պետդեպարտամենտը նշել է, որ Բլինկենը և Չավուշօղլուն զրույցի ընթացքում քննարկել են նաեւ Ուկրաինային ուղղվող շարունակվող աջակցությունը:
«Պետքարտուղարը երախտագիտություն է հայտնել թուրք նախարարին այն դիվանագիտական ջանքերի համար, որոնք ուղղված են ուկրաինական գյուղատնտեսական ապրանքները դեպի համաշխարհային շուկա արտահանելուն»,- ասված է հաղորդագրության մեջ:
