Backstreet Boys խմբի անդամ Նիք Քարթերին մեղադրել են անչափահասի նկատմամբ սեռական բռնության մեջ։ Այս մասին հայտնում է Variety-ն։
Պարբերականի տվյալներով՝ զոհ է դարձել Շենոն Ռութը, որն այժմ 39 տարեկան է։ Կինը տառապում է աուտիզմով և ուղեղային կաթվածով: Կինը Քարթերի դեմ հայց է ներկայացրել Նևադա նահանգի Քլարկ շրջանի դատարան։
Դատական փաստաթղթերից հայտնի է դառնում, որ միջադեպը տեղի է ունեցել 2001 թվականին։ Այն ժամանակ Ռութը ընդամենը 17 տարեկան էր։ Քարթերը Վաշինգտոնի Տակոմա քաղաքում խմբի համերգից հետո, իբր, տեսել է անչափահաս երկրպագուին, որը հերթ է կանգնել ինքնագրի համար և հրավիրել նրան ավտոբուսով շրջագայության: Այնտեղ արտիստը նրան ալկոհոլ է հյուրասիրել, ապա բռնաբարել աղջկան։ Տուժողի խոսքով՝ երգիչը վախեցրել է իրեն։ Մասնավորապես, նա հայտարարել է, որ եթե Ռութը ինչ-որ մեկին պատմի տեղի ունեցածի մասին, նրան «ոչ ոք չի հավատա»։
Կնոջ փաստաբանները նաև պնդում են, որ տեղի ունեցածի պատճառով Ռութը վարակվել է մարդու պապիլոմավիրուսով։
ABC հեռուստաալիքը արտիստին առաջադրված մեղադրանքներից հետո հրաժարվել է Backstreet Boys խմբի հատուկ սուրբծննդյան շոուի՝ a Very Backstreet Holiday ծրագրից:
Ինքը՝ Քարթերը, հերքում է բոլոր մեղադրանքները։ Նրա փաստաբան Մայքլ Հոլցի խոսքով՝ նման հայտարարությունները իրավաբանորեն հիմնավորված չեն և «բնավ չեն համապատասխանում իրականությանը»։
«Ցավոք, արդեն մի քանի տարի է, ինչ Միսս Ռութը մանիպուլյացիայի է ենթարկվել՝ կեղծ մեղադրանքներ առաջադրելով Նիք Քարթերի նկատմամբ։ Այդ մեղադրանքները ժամանակի ընթացքում բազմիցս և էապես փոխվել են», – հայտնել է երաժշտի պաշտպանը։
