ՌԴ ԱԳՆ-ն հայտնել է հունվարի 17-ին նախատեսված Ռուսաստանի և Իրանի արտաքին գործերի նախարարներ Սերգեյ Լավրովի և Հոսեյն Ամիր Աբդոլահիյանի բանակցություններն ավելի ուշ ժամկետ տեղափոխելու մասին: Նույն օրը իրանցի նախարարը կայցելի Թուրքիա։
«Կողմերի փոխադարձ պայմանավորվածության համաձայն՝ հունվարի 17 – ին Ռուսաստանի Դաշնության արտաքին գործերի նախարար Սերգեյ Լավրովի և Իրանի Իսլամական Հանրապետության արտաքին գործերի նախարար Հոսեյն Ամիր Աբդոլահիյանի միջև ավելի վաղ պլանավորված բանակցությունները հետաձգվել են ավելի ուշ ժամկետներում», – ТАСС-ը մեջբերում է Ռուսաստանի ԱԳՆ-ի հաղորդագրությունը:
Գործակալությունը նշում է, որ ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտնել էր, որ համապատասխան բանակցությունների ընթացքում, ինչպես ենթադրվում էր, նախարարները կքննարկեն իրանական միջուկային գործարքի շուրջ ստեղծված իրավիճակը, փոխգործակցությունը ՄԱԿ-ում և ՇՀԿ-ում, իրավիճակը Սիրիայում, Աֆղանստանում, Անդրկովկասում, ինչպես նաև Կասպից ծովի խնդիրները: Բանակցությունների օրակարգի ևս մեկ հարց պետք է դառնար ԵԱՏՄ-ի և Իրանի միջև ազատ առևտրի գոտու մասին լիարժեք համաձայնագրի կնքման գործընթացի վերջնական փուլին անցումը:
Այսօր հայտնի դարձավ նաև, որ Իրանի արտգործնախարարը հունվարի 17-ին կայցելի Թուրքիա։ «Հունվարի 17-ին Իրանի ԱԳ նախարարն իր թուրք գործընկեր Մեվլութ Չավուշօղլուի հրավերով կայցելի Թուրքիա», – ասված է ИРНА գործակալության հաղորդագրության մեջ:
Ավելի վաղ՝ հունվարի 14-ին, Հոսեյն Ամիր-Աբդոլլահիանը այցելել էր Սիրիա, որտեղ բանակցություններ էր վարել երկրի նախագահ Բաշար Ասադի և արտաքին գործերի նախարար Ֆեյսալ Մեքդադի հետ։
