Թուրքիայում ուժեղ երկրաշարժը կարող է հետաձգել այս երկրում գազային հանգույցի ստեղծումը, սակայն նախագիծը կիրականացվի, հայտարարել են Կրեմլում, փոխանցում է Interfax-ը։
«Իհարկե, այժմ գազային հանգույցի նախագիծը չի կարող առաջնահերթություն լինել Թուրքիայի Հանրապետության համար, մենք դրան ըմբռնումով ենք վերաբերվում։ Ըստ այդմ, կարող է լինել որոշակի ժամանակի հետաձգում»,- ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով հարցին, թե արդյոք Թուրքիայում տեղի ունեցած երկրաշարժը կարող է ազդել նախագծի իրականացման վրա։
Պեսկովի խոսքով՝ կասկած չունեն, որ Թուրքիան կհաղթահարի այս աղետը, իսկ ՌԴ-ն անհրաժեշտ օգնություն կտրամադրի տուժածներին և կօգնի վերականգնել ավերված քաղաքները։
«Հետևաբար, այո՛, այս գործընթացը կարող է մի փոքր դանդաղել, բայց իրականում չի ազդի ծրագրերի իրականացման վրա»,- ասել է ՌԴ նախագահի մամուլի քարտուղարը։
Ավելի վաղ Թուրքիան հայտնել էր, որ միջազգային էներգետիկ հանգույցն իր աշխատանքը կսկսի 2023 թվականին։ Հունվարին Թուրքիայի նախագահ Ռեջեփ Թայիփ Էրդողանը տեղեկացրել էր, որ մոտ ժամանակներս ծրագրվում է ավարտել նախագծի ճանապարհային քարտեզի պատրաստման աշխատանքները և ձեռնամուխ լինել դրա իրականացման կոնկրետ քայլերին:
