Կալիֆոռնիայի բնակիչը Սան Ֆերնանդոյում գտնվող լքված պահեստում հայտնաբերել է 12 ձայներիզ, որոնց վրա Մայքլ Ջեքսոնի չհրապարակված ձայնագրություններն են, հայտնել է The Hollywood Reporter թերթը։
Լրատվականի տվյալներով՝ հատվածները ձայնագրվել են մինչև Dangerous (1991) ալբոմի թողարկումը՝ 1989-1991 թվականներին։
56-ամյա Գրեգ Մուսգրովը, ով հայտնաբերել է հավաքածուն, լրատվականին պատմել է, որ պահեստի մասին իմացել է իր ծանոթից, որը գնել է տարածքը։ Ամերիկացու խոսքով՝ պահեստը նախկինում պատկանել է երաժշտական պրոդյուսեր և երգիչ Բրայան Լորենին։
«Ես այցելել եմ երկրպագուների բոլոր կայքերը։ Խոսակցություններ կան, որ երգերից մի քանիսը հայտնվել են համացանցում։ Նրանցից մի քանիսը նույնիսկ լույս են տեսել»,- նշել է նա։
Ինչպես հայտնել է The Hollywood Reporter-ը, ժապավեններից մեկը ֆիքսել է Ջեքսոնի և, ենթադրաբար, Լորենի խոսակցությունը։ «Ես լսում եմ այն, և ես տանջվում եմ, քանի որ ոչ ոք երբևէ չի լսել դրանք։ Մայքլ Ջեքսոնի խոսքերն ու կատակները լսելը իսկապես հիանալի էր»,- խոստովանել է Մուսգրովը:
Պարբերականը նշել է, որ չհրապարակված թրեքների թվում կա Don’t Believe It կոչվող երգը, որը, հավանաբար, պատասխան էր 1990-ականներին ԶԼՄ-ներում տարածված Ջեքսոնի մասին բացասական խոսակցություններին:
