Երևանում ամփոփվել են Ամանորի և Սուրբծննդյան միջոցառումները։ Այս մասին հայտնում է Երևանի քաղաքապետարանը։
Ամանորի և Սուրբծննդյան օրերին քաղաքի ամենահյուրառատ անկյունը Հանրապետության հրապարակն էր ու Երևանի հիմնադրման 2750-ամյակին նվիրված շատրվանների պուրակը՝ իր համերգային ծրագրերով ու սուրբծննդյան տոնավաճառով։
Նշվում է, որ հունվարի 6-ին բեմում քաղաքի խորհրդանիշը դարձած արվեստագետներն էին՝ Ռուբեն Հախվերդյանն ու Ֆորշը՝ քաղաքի, մարդկանց ու Երևանում թևածող հավերժական սիրո նոտաներով:
Քաղաքապետարանը հայտնում է, որ երևանյան մեղեդիները պուրակ էին բերել երիտասարդներին, տարեցներին ու անգամ փոքրերին: Երեկոն տպավորել էր նաև զբոսաշրջիկներին:
«Ունեցել ենք 9 համարգային ծրագիր, որոնց մասնակցել է ավելի քան 30 արտիստ»,- ասել է Երևանի քաղաքապետարանի աշխատակազմի մշակույթի և տուրիզմի վարչության պետ Գոշ Սարգսյանը:
Նշվում է, որ ամանորյա միջոցառումները Երևանը նորովի բացահայտելու հնարավորություն էին և որ 2023 թվականին մայրաքաղաքը խոստանում է լինել առավել մշակութային: