ՀՀ Պաշտպանության նախարարության ներկայացուցիչ Արծրուն Հովհաննիսյանը ներկայացրեց Արցախի նկատմամբ սանձազերծած պատերազմում Ադրբեջանի Զինված ուժերի` վերջին մի քանի օրվա ընթացքում որդեգրած քաղաքականությունը:
«Վերջին մի քանի օրերի ընթացքում Ադրբեջանի ԶՈՒ-ն որդեգրել է հետևյալ քաղաքականությունը` հեռախոսախցիկներին գործողություններով մերձռազմաճակատային տարբեր բնակավայրերում արագ ներթափանցումներ իրականացնել, տեղեկատվական ակցիաներ իրականացնել, տարբեր շենքերի վրա դրոշներ պարզելով նկարվել, որպեսզի հոգեբանական ազդեցություն թողնեն իրենց, հետո նաև մեր հասարակության վրա: Խնդիրը հետևյալն է` արդեն երկարաժամկետ մարտական գործողությունների ընթացքում, կոտրելով սեփական զինված ուժերի մեծ ներուժը, հարձակողական մարտերում մեծ, էական առաջընթաց ու հաջողություններ չունենալով, Ադրբեջանի հասարակությանը պետք է կերակրել նման տեղեկություններով»,- ասաց Հովհաննիսյանը:
Արծրուն Հովհաննիսյանը հավելեց, որ այս օրերի ընթացքում Ադրբեջանի երեք-չորս բանակային կորպուսին հաջողվել է մեկ գնդի առջև առկա խնդրի չափով առաջխաղացում ունենալ:
«14-15 օրվա ընթացքում մեկ գնդի առաջ առկա խնդրի ծավալով առաջխաղացում ապահոված ադրբեջանական երեք-չորս բանակային կորպուսները մեծ հաշվով մեծ գովելու բան չունեն: Ցանկացած օտարազգի ռազմական փորձագետ կհաստատի իմ ասածը: Դրանից հետո ոչինչ չի մնում, բացի նրանից, որ դիվերսիոն խմբերն արագ ներթափանցումներ կատարեն տարբեր բնակավայրեր, նկարվեն տարբեր շինությունների մոտ ու ներկայացնեն դրանք որպես բնակավայրի գյուղապետարան կամ քաղաքապետարան»,- նշեց Արծրուն Հովհաննիսյանը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հայկական կողմից, նախնական տվյալներով, կա 532 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները։
Հիշեցնենք նաև, որ Մոսկվայում հոկտեմբերի 9-ին սկսված և ավելի քան 10 ժամ տևած բանակցությունների արդյունքում Ռուսաստանի, Հայաստանի և Ադրբեջանի արտաքին գործերի նախարարները հայտարարել են 2020 թվականի հոկտեմբերի 10-ին ժամը 12:00-ից հրադադարի հաստատման մասին: Ըստ նախնական համաձայնության՝ հրադադարը հաստատվում է հումանիտար նպատակներով՝ ռազմագերիների և այլ անձանց և զոհվածների մարմինների փոխանակման համար՝ Կարմիր խաչի միջազգային կոմիտեի միջնորդությամբ և չափանիշներին համապատասխան: