Մարուքյանն անդրադարձել է երեկվա հայտարարության մասին իշխանության ներկայացուցիչների պնդումներին

«Իշխանության ներկայացուցիչները շարունակում են պնդել, որ երեկ Մոսկվայում ստորագրված նոր փաստաթուղթը ձեռնտու է Հայաստանին, քանի որ ըստ դրա՝ հնարավորություն կստանանք երկաթուղով Ադրբեջանի տարածքով կապ հաստատել Ռուսաստանի հետ՝ թյուր կարծիք տարածելով, թե դա այսուհետ անվտանգ է լինելու։

Ընդգծեմ՝ Ադրբեջանի տարածքով՝

այն երկրի տարածքով, որը մինչ այժմ չի վերադարձրել մեր ռազմագերիներին, գերի ընկած քաղաքացիական անձանց,

այն երկրի տարածքով, որի իշխանությունների հայատյաց քաղաքականության արդյունքում և այդ իշխանության թողտվությամբ ու վստահաբար նաև հավանությամբ՝ այդ երկրի զինված ուժերի ծառայողները իսլամական պետությանը համանման մեթոդներով խոշտանգեցին ու գլխատեցին մեր զինվորներին ու քաղաքացիներին՝ չխնայելով անգամ ծերերին ու հիվանդներին,

այն պետության տարածքով, որը մեր դեմ չխորշեց օգտագործել վարձու ահաբեկիչների,

այն պետության տարածքով, որի կողմից ռմբակոծվեց ծննդատուն և եկեղեցի,

այն պետության տարածքով, որի զինծառայողը հերոսացվեց ու ամենաբարձր մակարդակով պարգևատրվեց մեր սպային քնած ժամանակ կացնահարելու համար ․․․

Շարունակեք պնդել, որ դուք լուրջ ձեռքբերումներ ունեք»,-գրել է Մարուքյանը։

Հիշեցնենք, որ երեկ՝ հունվարի 11-ին կայացել է ՀՀ վարչապետ Նիկոլ Փաշինյանի, ՌԴ և Ադրբեջանի նախագահներ Վլադիմիր Պուտինի և Իլհամ Ալիևի եռակողմ հանդիպումը, որից հետո ստորագրվել է հայտարարություն։

ԱԺ Իմ քայլը խմբակցության պատգամավոր Ռուբեն Ռուբինյանն իր Facebook-ի էջում գրել էր, որ ապաշրջափակումը բխում է Հայաստանի շահերից։