Որոշել եմ հրաժարվել «Ազատ հայրենիք» կուսակցության նախագահի պաշտոնից և դուրս գալ կուսակցությունից, որպեսզի Հանրապետության նախագահի պաշտոնում ես կարողանամ գործել և ընկալվել որպես պետության վերկուսակցական գլուխ, որպես մի գործիչ, որը պետք է ընդունվի որպես հատկապես ճգնաժամային իրավիճակներում համախմբող անձ։ Այս մասին իր տեսաուղերձում հայտնել է Արայիկ Հարությունյանը։
«Միևնույն ժամանակ գիտակցելով պատերազմի հետևանքով առաջացած հանրային ու քաղաքական որոշակի տրամադրությունները Հանրապետության նախագահի պաշտոնից իմ հրաժարականի անհրաժեշտության մասով՝ կուզեի նշել, որ պատրաստ եմ հրաժարական տալ առաջին իսկ հնարավորության դեպքում, երբ Հանրապետությունը ներքին ու արտաքին պայմանների ու սահմանադրական կարգավորումների առումով պատրաստ լինի պատշաճորեն ու արժանապատվորեն հաղթահարել նախագահական ու խորհրդարանական ընտրությունների ծանր դժվարությունները»,- ասաց Հարությունյանը։
Հիշեցնենք, որ Արայիկ Հարությունյանը Արցախի Հանրապետության Նախագահ է ընտրվել 2020 թ. ապրիլի 14-ին կայացած նախագահական ընտրությունների երկրորդ փուլի արդյունքներով։ Նա զգալիորեն առաջ էր անցել Մասիս Մայիլյանից՝ հավաքելով ձայների 87%-ը: Նրա գլխավորած «Ազատ հայրենիք»/«Միացյալ քաղաքացիական դաշինք» դաշինքը 16 տեղ ստացավ Արցախի 33 մանդատ ունեցող խորհրդարանում: