Երևանի քաղաքապետարանը հրատարակել է «Երևանը քո գրպանում» զբոսաշրջային տեղեկատուի ռուսերեն տարբերակը։ Տեղեկագրքի հրատարակման հարցում աջակցել է Երևանում «Дом Москвы» կենտրոնը։
Տեղեկատուն մայրաքաղաքի պատմական և մշակութային հուշարձանների, թանգարանների, թատրոնների, հյուրանոցների, ժամանցային կենտրոնների, դեսպանատների և հյուպատոսարանների, ինչպես նաև ազգային առանձնահատկությունների վերաբերյալ տուրիստական հետաքրքրություն ներկայացնող տեղեկատվություն է պարունակում։ Գրքույկը պարունակում է նաև քարտեզներ, հեռախոսահամարներ, կայքեր, որոշ բաժիններ ունեն նաև QR կոդեր։
«Հաշվի առնելով Ռուսաստանից զբոսաշրջիկների աճող հոսքը՝ Երևանի քաղաքապետարանի մշակույթի և տուրիզմի վարչությունը նախաձեռնել է տեղեկատուի ռուսերեն տարբերակի հրատարակումը։ Մենք հույս ունենք, որ այն օգտակար կլինի ռուսախոս զբոսաշրջիկների համար»,- ասել է Երևանի քաղաքապետի տեղակալ Գայանե Մելքոմյանը։
