Յոթ տարվա ընդմիջումից հետո Թուրքիայի Դիարբեքիր նահանգում բացվել է Մերձավոր Արևելքի հայ համայնքի ամենամեծ՝ Սուրբ Կիրակոս եկեղեցին։ Այս մասին հայտնում է bianet կայքը։
Աղբյուրի համաձայն՝ մայիսի 8-ին Թուրքիայի Հայոց պատրիարք Սահակ Մաշալյանի մասնակցությամբ տեղի է ունեցել առաջին սուրբ ծառայությունը։
Եկեղեցին տուժել է բազմաթիվ հրդեհներից և երկար տարիներ ավերակ է եղել։ Դիարբեքիրի քաղաքապետարանի և հայ համայնքի աջակցությամբ եկեղեցին 30 տարի անց վերականգնվել է և վերաբացվել։
2015 թվականին եկեղեցին վերսկսել է իր գործունեությունը, սակայն 2015-2016 թվականներին Դիարբեքիր քաղաքի մոտ տեղի ունեցած բախումների ժամանակ այն վնասվել է և կրկին փակվել։
Ավելի քան 800 տարվա պատմություն ունեցող եկեղեցին կառուցվել է 1376 թվականին։ Նախկինում այն բազմիցս ավերվել ու վերակառուցվել է, հայկական եկեղեցու որոշ հատվածներ ամբողջությամբ վերակառուցվել են 1880-ական թվականներին։ Առաջին համաշխարհային պատերազմի տարիներին եկեղեցին ծառայել է որպես գերմանական կենտրոն, այնուհետև օգտագործվել որպես պահեստ։
Տեղացիների շրջանում եկեղեցին հայտնի է նաև որպես «Բրինձ եկեղեցի», քանի որ երկար ժամանակ եղել է բրնձի գործարան։ Շենքը ներկայումս պատկանում է Դիարբեքիրի Սուրբ Կիրակոս հայկական եկեղեցու հիմնադրամին։ Այն ունի 3769 քառ. մետր տարածք և գտնվում է Դիարբեքիր քաղաքի Ալիփաշա թաղամասում։ Դիարբեքիրի հնագիտական թանգարանի հուշատախտակի վրա նշվում է, որ քրիստոնեական պաշտամունքի վայրը վերջին անգամ վերականգնվել է 1840 թվականին։
