Հնդկաստանի Չեննայ քաղաքում ավարտին է մոտենում Շախմատի համաշխարհային օլիմպիադան։ Վերջին՝ 11-րդ տուրում Հայաստանի տղամարդկանց հավաքականը 2,5:1,5 հաշվով առավելության է հասել Իսպանիայի ընտրանու նկատմամբ։
Չեմպիոնի տիտղոսն առաջին անգամ նվաճել է Ուզբեկստանի հավաքականը, որը վերջին տուրում 2,5:1,5 հաշվով պարտության է մատնել Նիդեռլանդների հավաքականին։
Ուզբեկստանի և Հայաստանի հավաքականները վաստակել են 19 միավոր, սակայն լրացուցիչ ցուցանիշներով Հայաստանի հավաքականը զիջել է։
Հայաստանի տղամարդկանց հավաքականը նախկինում դարձել է Օլիմպիական խաղերի չեմպիոն 2006, 2008 և 2012 թվականներին։
Ավելի վաղ Armenia Today-ը հայտնել էր, որ նախորդ տուրերում հայ շախմատիստները հաղթել են Ադրբեջանի (3:1), Մադագասկարի (4:0), Անդորրայի (3:1), Եգիպտոսի (2.5:1.5), Ավստրիայի (3:1), Անգլիայի (2,5: 1,5) և Հնդկաստանի B (2,5: 1,5) հավաքականներին, ոչ-ոքի խաղացել ԱՄՆ-ի ընտրանու հետ (2:2) և պարտվել Ուզբեկստանին (1:3):
Շախմատի համաշխարհային օլիմպիադան տեղի կունենա Հնդկաստանի Չեննայ քաղաքում հուլիսի 28-ից օգոստոսի 10-ը։ Օլիմպիադայում տեղի կունենա 11 տուր։
Հայաստանի հավաքականը ներկայացված է տղամարդկանց և կանանց հավաքականներով։ Տղամարդկանց թիմում ընդգրկված են շախմատիստներ Գաբրիել Սարգսյանը, Հրանտ Մելքումյանը, Սամվել Տեր-Սահակյանը, Մանուել Պետրոսյանը և Ռոբերտ Հովհաննիսյանը։ Հայաստանի կանանց հավաքականը ներկայացնում են Էլինա Դանիելյանը, Լիլիթ Մկրտչյանը, Աննա Սարգսյանը, Մարիամ Մկրտչյանը և Սուսաննա Գաբոյանը։
