Արցախի ԱԳ նախարարը հանդիպել է «Հայաստան» հիմնադրամի պատասխանատուների հետ, այցելել Լոս Անջելեսում ՀՀ հյուպատոսություն

Սեպտեմբերի 23-ին Արցախի ԱԳ նախարար Դավիթ Բաբայանը Լոս Անջելեսում հանդիպել է ԱՄՆ-ում «Հայաստան» հիմնադրամի նախագահ Մարիա Մեհրանյանի և կառույցի խորհրդի պատասխանատուների հետ։ Այս մասին հայտնում է Արցախի ԱԳ նախարարությունը։

Հանդիպման ընթացքում քննարկվել են Արցախի սոցիալ-տնտեսական զարգացմանը, տարածաշրջանում տիրող իրավիճակին վերաբերող հարցեր։ Նախարար Բաբայանը բարձր է գնահատել կազմակերպության ներդրումը Արցախի զարգացման և շենացման գործում՝ նշելով, որ «Հայաստան» համահայկական հիմնադրամը գործուն մասնակցություն է ունեցել Արցախում իրականացված մի շարք ռազմավարական ծրագրերում։

ԱՄՆ աշխատանքային այցի շրջանակում Դավիթ Բաբայանն այցելել է Լոս Անջելեսում ՀՀ հյուպատոսություն, հանդիպել հյուպատոսության աշխատակազմի հետ։ Բաբայնը կարևորել է Լոս-Անջելեսում ՀՀ հյուպատոսության դերը Հայրենիք-Սփյուռք փոխգործակցության ամրապնդման գործում՝ այդ համատեքստում ընդգծելով հայաշատ վայրերի հետ կապերի շարունակական ընդլայնման ու խորացման անհրաժեշտությունը։