«Հրապարակ» թերթը պարզել է, թե «Հայաստան» խմբակցության թեկնածուներից ով է հրաժարվելու և ով է վերցնելու պատգամավորական մանդատները։
Ըստ հրապարակման՝ Վանաձորի նախկին քաղաքապետ Սամվել Դարբինյանի հարսը, որը դաշինքի ցուցակում 36-րդ տեղն է զբաղեցնում Արամ Վարդևանյանից հետո, մտադիր չէ փոխել իր բժշկական գործունեությունը պատգամավորական մանդատի համար։ Մանդատից հրաժարվելու որոշման մասին թերթին հայտնել է նաև ԵՊՀ արևելագիտության ֆակուլտետի դեկան Ռուբեն Մելքոնյանը, փոխարենը մանդատը կստանա խմբակցության ղեկավար Սեյրան Օհանյանի օգնական Մհեր Սահակյանը, մանրամասնում է թերթը։
Մանդատից կհրաժարվեն նաև «Վերածնունդ Հայաստան» կուսակցության անդամներ Մարիա Պետրոսյանը և Ռոբերտ Հայրապետյանը, որոնք ցուցակում զբաղեցնում են համապատասխանաբար 39-րդ եւ 41-րդ տեղերը։ Պահեստային ոստիկանության գնդապետ Սայաթ Շիրինյանը, որը մի քանի ամիս անձնական գործերով Ղազախստանում է, հավանաբար կհրաժարվի մանդատից։ Ցուցակի հաջորդ պատգամավորները կլինեն ՀՅԴ անդամ Արփինե Վարդանյանը, Չոլաքար համայնքի ղեկավար Արման Ղազարյանը և հայտնի ծաղրանկարիչ Դավիթ Սահակյանցը՝ Ռոբերտ Սահակյանցի որդին։
Այսպիսով, նշում է թերթը, «Հայաստան» խմբակցությունում կլինեն 19 տղամարդ և 10 կին։
«Հայաստան» դաշինքի մաս կազմող «Վերածնունդ Հայաստան» կուսակցությունը նոյեմբերի 29-ին հայտարարություն էր տարածել Ազգային ժողովում իր գործունեությունը դադարեցնելու մասին։ Կուսակցության 4 ներկայացուցիչներից 3-ը հրաժարվել էին պատգամավորական լիազորություններից՝ կուսակցության նախագահ Վահե Հակոբյանը և փոխնախագահներ Հռիփսիմե Ստամբուլյանը և Ելենա Կիրակոսյանը։
Ավելի վաղ պատգամավորական մանդատներից հրաժարվել էին «Հայաստան» դաշինքի ներկայացուցիչներ Արթուր Ղազինյանը և Արամ Վարդևանյանը։
