Ուզբեկստանում ընթացող բռնցքամարտի աշխարհի առաջնությունում Հայաստանը ներկայացնող 86 կգ քաշային Ռաֆայել Հովհաննիսյանը տեխնիկական նոկաուտով հաղթել է Թուրքիայի ներկայացուցիչ Հաքան Կոչին և դուրս եկել քառորդ եզրափակիչ։ Այս մասին տեղեկացնում է Հայաստանի բռնցքամարտի ֆեդերացիան։
«Հայ մարզիկի համար քիչ թե շատ բարդ է ստացվել միայն առաջին ռաունդը, որտեղ Հովհաննիսյանը հաղթել է 3։2 հաշվով։ 2-րդ ռաունդում Հովհաննիսյանը պարզապես քարուքանդ է արել թուրք մրցակցին։ Մի շարք ուժգին հարվածներ, 3 նոկդաուն, որից հետո մրցավարը դադարեցրել է մենամարտը»,- հայտնում է ֆեդերացիան։
Քառորդ եզրափակչում Ռաֆայել Հովհաննիսյանը կմրցի Վրաստանի ներկայացուցիչ Գեորգի Կուշիտաշվիլիի հետ։
Այսօր ավելի վաղ քառորդ եզրափակչում հանդես գալու իրավունք էր նվաճել նաև Եվրոպայի առաջնության բրոնզե մեդալակիր Նարեկ Մանասյանը։ 92 կգ քաշայինների 1/8 եզրափակչում Մանասյանը մենամարտել էր իրանցի Պուրիա Ամիրիի հետ և երեք ռաունդներում ունենալով բացահայտ առավելություն՝ 5:0 հաշվով հաղթանակ էր տարել ու դուրս եկել քառորդ եզրափակիչ:
Բռնցքամարտի տղամարդկանց աշխարհի առաջնությանը մասնակցում է 11 մարզիկով։ Կարեն Աղամալյանի գլխավորությամբ մրցավայր են մեկնել Բարեղամ Հարությունյանը (48 կգ), Ռուդոլֆ Գարբոյանը (51 կգ), Ռուսլան Ասլիկյանը (54 կգ), Արթուր Բազեյանը (57 կգ), Արթուր Ղազարյանը (60 կգ), Հովհաննես Բաչկովը (63,5), Գուրգեն Մադոյանը (67կգ), Համբարձում Հակոբյանը (80 կգ), Ռաֆայել Հովհաննիսյանը (86 կգ), Նարեկ Մանասյանը (92 կգ) և Դավիթ Չալոյանը (92+կգ):
