Արամ Ոսկանյանը նշանակվել է «Սյունիք» ֆուտբոլային թիմի գլխավոր մարզիչ

Արամ Ոսկանյանը նշանակվել է «Սյունիք» ֆուտբոլային թիմի գլխավոր մարզիչ, հայտնում է ակումբի պաշտոնական կայքը։

Ոսկանյանը մարզչական կարիերան սկսել է 2011-ին՝ ընդգրկվելով «Միկայի» մարզչական շտաբում, իսկ 2013-ին նշանակվել է թիմի գլխավոր մարզիչ։ 47-ամյա մասնագետը մարզել է նաև «Բանանցը», «Ալաշկերտը» և «Արարատը»։ 2015-2017 թթ․ Ոսկանյանը գլխավորել է Հայաստանի Մ19 հավաքականը։ 2020-2021 թթ․ Ոսկանյանը մարզել է ղազախական «Ատիրաուն», որը նրա գլխավորությամբ դարձել է Առաջին խմբի չեմպիոն և նվաճել Պրեմիեր լիգայի ուղեգիր։

Որպես ֆուտբոլիստ՝ Արամ Ոսկանյանը հանդես է եկել «Բանանցում», «Փյունիկում», «Արարատում», «Միկայում», ինչպես նաև ռուսական «Բալթիկա», «Սանկտ-Պետերբուրգ», ղազախական «Եսիլ-Բոգատիր», «Կիզիլ-Ժար» ակումբներում և Տաշքենդի «Լոկոմոտիվում»։

Հայաստանի կրկնակի չեմպիոն է, եռակի գավաթակիր։ Ոսկանյանը հանդես է եկել նաև Հայաստանի երիտասարդական և ազգային հավաքականներում։
«Սյունիքն» Արամ Ոսկանյանի հետ կնքել է 3 տարվա պայմանագիր, հայտնում է ակումբի լրատվության բաժինը։