Ի պատիվ «Մետաքսի ճանապարհ» համաժողովին մասնակցող պատվիրակությունների ղեկավարների՝ Վրաստանի վարչապետ Իրակլի Ղարիբաշվիլին ընթրիք է կազմակերպել, հայտնել են Վրաստանի վարչապետի աշխատակազմից։
Վարչապետի աշխատակազմի տեղեկատվության և հասարակայնության հետ կապերի վարչություն պետ Արմեն Խաչատրյանը Armenia Today-ի հետ զրույցում հայտնել է, որ ընթրիքից հետո Հայաստանի վարչապետ Նիկոլ Փաշինյանը և Ադրբեջանի վարչապետ Ալի Ասադովը ոչ պաշտոնական շփում են ունեցել։
Նշենք, որ ադրբեջանական ԶԼՄ-ները հայտնել էին, որ Նիկոլ Փաշինյանը և Ալի Ասադովը հանդիպել են Վրաստանի վարչապետ Իրակլի Ղարիբաշվիլիի միջնորդությամբ։ Վրացական ԶԼՄ-ների տեղեկություններով էլ հանդիպումը տևել է մի քանի ժամ։
Վարչապետ Նիկոլ Փաշինյանը հոկտեմբերի 26-ին մեկօրյա աշխատանքային այցով մեկնել էր Վրաստան, որտեղ մասնակցել էր Թբիլիսիի «Մետաքսի ճանապարհ» միջազգային համաժողովին:
Թբիլիսիում Հայաստանի և Վրաստանի վարչապետներ Նիկոլ Փաշինյանը և Իրակլի Ղարիբաշվիլին քննարկել էին հայ-վրացական համագործակցության օրակարգը:
