Հունիսի 18-ին Երևանում՝ Ալեքսանդր Սպենդարյանի անվան օպերայի և բալետի ազգային ակադեմիական թատրոնում, նշանավոր օպերային երգիչները համերգային ծրագրով կլինեն մեկ բեմում։
«Սանկտ Պետերբուրգի պալատները Երևանում» միջազգային երաժշտական փառատոնի շրջանակում Երևանի, Սանկտ Պետերբուրգի, Մոսկվայի և առաջատար օպերային թատրոնների վոկալիստները գալա համերգ կունենան՝ նվիրված աշխարհահռչակ երգիչ Ֆյոդոր Շալյապինին:
Ելույթ կունենան միջազգային մրցույթների դափնեկիրներ, Մեծ, Մարիինսկու և Միխայլովսկու անվան թատրոնների առաջատար մենակատարներ Կարեն Ակոպովը, Յուրի Վլասովը, Սերգեյ Սևաստյանովը, ինչպես նաև Օպերայի և բալետի ազգային ակադեմիական թատրոնի մենակատար Հովհաննես Ներսեսյանը։ Հանդիսատեսը կտեսնի Ռիմսկի-Կորսակովի, Մուսորգսկու, Ռուբինշտեյնի, Չայկովսկու, Գլինկայի, Ռախմանինովի, Վերդիի, Մոցարտի, Գունոդի օպերաներից բեմադրված վառ թատերական բեմադրություններ, որոնցում Ֆյոդոր Շալյապինը հանդես է եկել որպես մենակատար։
Ծրագրում ներառված են նաև երգեր և լիրիկական ռոմանսներ։ Գեղարվեստական ղեկավարը Մարիա Սաֆարյանցն է, ռեժիսորը՝ Արկադի Ղևոնդովը, դիրիժորը՝ Իգոր Տոմաշևսկին։ Համերգը կսկսվի ժամը 19։00-ին։ Տոմսերը վաճառվում են 5000-20 000 դրամով։
