Հրազդանի կիրճում գտնվող Երևանի հիդրոէլեկտրակայանում հրդեհ է բռնկվել, Armenia Today-ին հայտնել է ՆԳՆ մամուլի խոսնակ Նարեկ Սարգսյանը։ Նախնական տվյալներով՝ մալուխներ են բռնկվել։
Հրդեհաշիջման աշխատանքներին ներգրավվել է ՆԳ նախարարության փրկարար ծառայության 3 մարտական հաշվարկ։ Բաց կրակ չկա, պարզաբանել է Սարգսյանը։
ՀԷԿ-ում բռնկված հրդեհի հետևանքով Երևանի մի մասը մնացել է առանց էլեկտրականության։ Ինչպես Armenia Today-ին հայտնել է «Հայաստանի էլեկտրական ցանցեր» ընկերության մամուլի խոսնակ Նատալյա Սարջանյանը, Կորյուն փողոցից մինչև Բաղրամյան պողոտա հոսանք չկա։
Armenia Today-ի թղթակցի խոսքով՝ Ծիծեռնակաբերդի խճուղում գտնվող Dalma Garden Mall-ը ևս հոսանքազրկվել է։
Ժամը 23։10-ին փրկարար ծառայությունը հայտնել է, որ հրդեհը մարվել է և տեղում իրականացվում են հետհանգեցման աշխատանքներ։
