ԱՄՆ երդվյալ ատենակալների դատարանը մեղավոր է ճանաչել ամերիկացի սենատոր Ռոբերտ Մենենդեսին կոռուպցիայի գործով բոլոր մեղադրանքներով, հայտնում է AP-ն:
Գործակալության տվյալներով՝ Մենենդեսը մեղավոր է ճանաչվել Նյու Ջերսիի երեք գործարարներից ոսկով և կանխիկ գումարով կաշառք ստանալու և Եգիպտոսի կառավարության համար որպես օտարերկրյա գործակալ աշխատելու մեղադրանքով: Մենենդեսը դատավարության ժամանակ ցուցմունք չի տվել, այլ պնդել է, որ նա պարզապես կատարում էր իր աշխատանքը՝ որպես Սենատի արտաքին հարաբերությունների հանձնաժողովի նախագահ:
Նա նաև պնդել է, որ Հետաքննությունների դաշնային բյուրոյի կողմից Նյու Ջերսիի իր տանը հայտնաբերված ոսկու ձուլակտորները պատկանում են իր կնոջը՝ Նադին Մենենդեսին: Մեղադրանք է առաջադրվել նաև սենատորի կնոջը։ Մենենդեսի դատավճիռը կկայանա հոկտեմբերի 29-ին։ Գործակալությունը նշում է, որ սենատորին սպառնում է երկարաժամկետ ազատազրկում։ 16 հոդվածներից, որոնցով նա մեղավոր է ճանաչվել, ամենածանրը ենթադրում է 20 տարվա ազատազրկում:
Սենատի մեծամասնության դեմոկրատական առաջնորդ Չակ Շումերն արդեն կոչ է արել Մենենդեսին հրաժարական տալ։ Գործակալությունը նշում է, որ դատարանի որոշումը կայացվել է ընտրությունների օրվանից չորս ամիս առաջ և պոտենցիալ խափանում է Մենենդեսի՝ որպես անկախ թեկնածու վերընտրվելու հնարավորությունները:
Մենենդեսն ԱՄՆ Ներկայացուցիչների պալատի անդամ է ընտրվել 1992 թվականին, իսկ 2006 թվականին դարձել սենատոր։ Նա նաև ԱՄՆ Կոնգրեսի հայկական հարցերով հանձնախմբի անդամ է:
