«Քաղաքացիական պայմանագիր» խմբակցության պատգամավոր, Առողջապահության նախկին նախարար Արսեն Թորոսյանը հաստատել է «Ժողովուրդ» օրաթերթի տեղեկությունը, որ իրեն կկանչեն հակակոռուպցիոն դատարան՝ Covid-19-ի հափշտակության գործի շրջանակում հարցաքննության։
Այսօր ավելի վաղ թերթը գրել էր, որ Թորոսյանին որպես վկա կկանչեն Հակակոռուպցիոն դատարան:
Թորոսյանը հայտնել է, որ անհամբեր սպասում է դատավարության օրվան, իսկ իրեն կանչելուն պես կզեկուցի հարցաքննության մասին։
«Անհամբեր սպասում եմ սույն «քրգործի» դատաքննության ժամանակ հարցաքննությանս՝ հիշեցնելով, որ նախաքննության ժամանակ ես եմ բազմաթիվ անգամ և հրապարակավ պնդել, որ ինձ հարցաքննեն, ինչը Հակակոռուպցիոն կոմիտեն հրաժարվում էր անել՝ դրանով իսկ կասկածի տակ դնելով նախաքննության լրիվությունը և անաչառությունը: Հենց իմացա դատարանում հարցաքննությանս օրը, հրապարակային կհայտնեմ դրա մասին, որպեսզի բոլոր նորմալ ԶԼՄ-ները գան և լուսաբանեն այն և իրականությունը պարզ դառնա բոլորին»,- գրել է նա։
Թերթը նշել է, որ սա առաջին անգամը չէ, որ Թորոսյանը հարցաքննվելու է գործի շրջանակում, որի քննարկումն սկսվել էր 2020թ.։
Լրատվականը հիշեցրել է, որ Covid-19-ի գործով 2023 թվականի մարտի 12-ին երկու ամսով կալանավորել էին Երևանի փոխքաղաքապետ, Առողջապահության նախկին փոխնախարար Գևորգ Սիմոնյանին և «Մեդլայն» կլինիկայի տնօրեն Բաբկեն Շահումյանին։
Հակակոռուպցիոն կոմիտեն պնդում է, որ Սիմոնյանը, պատասխանատու լինելով պետական ֆինանսավորման բաշխման համար, քավոր-սանիկական կապ ունենալով «Մեդլայն» կլինիկայի տնօրենի հետ՝ բավարար վերահսկողություն չի իրականացրել, ինչի հետևանքով Շահումյանը հափշտակել է շուրջ 120 միլիոն դրամ։
Սիմոնյանը, ով 2020-2022 թվականներին զբաղեցրել էր Առողջապահության նախարարության ղեկավարի տեղակալի պաշտոնը, չի ընդունել իրեն առաջադրված մեղադրանքը։
Հունիսի 30-ին օրաթերթը գրել էր, որ Հակակոռուպցիոն կոմիտեի ծանուցումը հասել էր Թորոսյանին, նա ներկայացել էր ու պարզաբանել, թե ինչպես են ծախսվել Covid-19-ի կանխարգելման համար նախատեսված գումարները, ով ում «քավորությամբ» էր տարբեր ծախսեր իրականացրել պետության հաշվին:
