ԱՄՆ նախագահի հանրապետական թեկնածու Դոնալդ Թրամփն աշխատել է որպես Փենսիլվանիայի McDonald’s արագ սննդի ռեստորանների ցանցի աշխատակից, հայտնում է ՏԱՍՍ-ը՝ հղում Fox News-ին։
Նշվում է, որ Թրամփը ժամանել է Ֆեստերվիլ քաղաքի McDonald’s ռեստորաններից մեկը և գոգնոց հագած՝ կարտոֆիլ ֆրիի մի քանի չափաբաժիններ է պատրաստել, ինչպես նաև իր հաշվին մի քանի պատվեր հյուրասիրել հաստատության այցելուներին։
Արագ սննդի ռեստորանում կես ժամ մնալու ընթացքում Թրամփը նշել է, որ իրեն դուր է գալիս աշխատել հաստատությունում և չի բացառել, որ կրկին կփորձի աշխատել ռեստորանում։
Իր կեսժամյա հերթափոխի ավարտին Թրամփը զրուցել է լրագրողների հետ։ Նա նշել է, որ այսօր առավոտյան կապ է հաստատել Իսրայելի վարչապետ Բենիամին Նեթանյահուի հետ և հավելել, որ հրեական պետությունն «այժմ ավելի ապահով է», քանի որ Իսրայելի իշխանությունները չեն լսում ԱՄՆ նախագահ Ջո Բայդենին։
ԱՄՆ նախագահի դեմոկրատական թեկնածու Քամալա Հարիսը և նրա հանրապետական մրցակից Թրամփն ընտրությունների օրվանից երեք շաբաթ առաջ հայտնվել էին լուրջ մրցավազքի մեջ, քանի որ յոթ որոշիչ նահանգներում միջին տարբերությունը 1%-ից պակաս է։
Հուլիսի 27-ին Հարիսը հայտարարել էր որպես նախագահի թեկնածու առաջադրվելու մասին։ Օգոստոսի 6-ին Հարիսը պաշտոնապես առաջադրվել էր որպես ԱՄՆ Դեմոկրատական կուսակցության նախագահի թեկնածու։
Հուլիսի 21-ին գործող նախագահ Բայդենը հայտարարել էր մրցապայքարից դուրս գալու մասին։ Դեմոկրատական կուսակցության ներկայացուցիչները Բայդենին փոխարինող գտնելու անհրաժեշտության մասին սկսել էին խոսել Թրամփի հետ հեռուստաբանավեճում 81-ամյա նախագահի անհաջող ելույթից հետո։
ԱՄՆ-ում նախագահական ընտրությունները կանցկացվեն 2024 թվականի նոյեմբերի 5-ին։
