Նախորդ շաբաթ Ազգային ժողովի նախագահ Ալեն Սիմոնյանը Ձորափի ռեստորաններից մեկում «մերձեցման երեկո» է անցկացրել «Քաղաքացիական պայմանագիր» խմբակցության կանանց հետ, գրել է «Հրապարակը»։
Ըստ թերթի՝ հրավիրվածների թվում էին բացառապես ՔՊ կին պատգամավորները։
«Հավանաբար, այսպիսով փորձում է իր նկատմամբ կանանց մոտ բարեհաճ վերաբերմունք ստեղծել։ ՔՊ-ում, սակայն, այդ խնջույքը հումորի և զվարճության թեմա է դարձել»,- նշել է լրատվականը։
Սեպտեմբերի 28-ին «Ժողովուրդ»-ը գրել էր, որ հանդուրժողականության մասին խոսող Սիմոնյանը պարբերաբար հարձակվում է ՔՊ անդամ չհանդիսացող ընդդիմադիր կանանց վրա և քննադատում իշխանությանը։ Թերթը նշել էր, որ սեպտեմբերի 27-ին նա վիրավորել է Արցախի խորհրդարանի պատգամավոր Մետաքսե Հակոբյանին։ «Ժողովուրդ»-ը հիշեցրել էր Ազգային ժողովի նախագահի և «Պատիվ ունեմ» պատգամավոր Աննա Մկրտչյանի միջև տեղի ունեցած վեճը։ 2023 թվականի սեպտեմբերին խորհրդարանի խոսնակը ՌԴ ԱԳՆ ներկայացուցիչ Մարիա Զախարովային անվանել էր «ինչ-որ քարտուղարուհի»։
