Կառավարությունը հավանություն տվեց մի շարք մասնագիտություններ և ծառայություններ 2025-ի հուլիսի 1-ից հատուկ հարկման համակարգից դուրս բերելու և հարկման ընդհանուր համակարգ ներառելու նախագծին։
Ֆինանսների նախարար Վահե Հովհաննիսյանը նշեց, որ նախագծերով առաջարկում են հուլիսի 1-ից մի շարք մասնագիտություններ և ծառայություններ դուրս բերել միկրոձեռնակատիրության և շրջանառության հարկերով հարկվող համակարգից և տեղափոխել հարկման ընդհանուր համակարգ։
«Խոսքը, մասնավորապես, իրավաբանական, հաշվապահական, կառավարման հարցերով խորհրդատվություն, շենքերի շինարարարության, մասնագիտակցված շինարարական գործունեությունների մասին է։ Հուլիսի 1-ից հարկման ընդհանուր համակարգ կտեղափոխվեն նաև անշարժ գույքի հետ գործառությունների, ճարտարապետական, ճարտարագիտական, տեխնիկական փորձաքննության, գովազդային, առողջապահության, ժամանակավոր աշխատուժով ապահովելու գործունեությունների տեսակները»,- հավելել է նախարարը։
Հովհաննիսյանի խոսքով՝ նպատակոը հավասար հարկային միջավայր ստեղծելն է։
ՊԵԿ նախագահ Ռուստամ Բադասյանը հավելել է, որ առողջապահության ոլորտի հատուկ հարկման համակարգում 1 300 սուբյեկտ կա։
2024-ի մայիսից փաստաբաններն իրենց բողոքի ձայնն էին բարձրացրել օրենսդրական փոփոխությունների դեմ, որով փաստաբանական գործունեությունը ևս ընդհանուր հարկման համակարգ է տեղափոխվում։ Փաստաբանների պալատի նախագահ Սիմոն Բաբայանը հայտարարել էր փաստաբանական ծառայությունների՝ ավելի քան 38%-ով թանկանալու հնարավորության մասին։
Թեպետ մայիսի 21-ին փաստաբանները գործադուլ էին հայտարարել, բայց Ազգային ժողովն ընդունել էր փոփոխությունները, որոնք, ֆինանսների նախարարի խոսքով, ուժի մեջ են մտնելու 2025-ի հունվարի 1-ից։
