Ժամը 17:30-ի սահմաններում Տեղ համայնքի հատվածում Ադրբեջանի ԶՈւ ստորաբաժանումները ականանետային միջոցներ են կիրառել։ Այս մասին հայտնում է ՀՀ ՊՆ մամուլի ծառայությունը՝ տեղեկացնելով, որ Ադրբեջանի ԶՈւ-ն շարունակում է սադրանքը:
«ԶՈւ ստորաբաժանումները ձեռնարկում են անհրաժեշտ պաշտպանական միջոցներ»,-հայտնում են ՊՆ-ից։
Հիշեցնենք, որ այսօր՝ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Նախնական տվյալներով հայկական կողմն ունի զոհեր և վիրավորներ:
Այսօր ավելի վաղ Armenia Today-ի հետ զրույցում Տեղի բնակիչները հայտնել էին, որ կրակոցների ձայներ են լսել։
Մարտի 30-ի երեկոյան ՀՀ ԱԱԾ-ն հաղորդել էր, որ ադրբեջանական կողմը Սյունիքի սահմանային հինգ հատվածներում 100-300 մետր ավելի առաջ է տեղակայվել։ Նշվում էր, որ տեղակայման ընթացքում ի հայտ են եկել քարտեզների տարընթերցումներ: Որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ:
Կառավարության ապրիլի 6-ի նիստում ՀՀ վարչապետ Նիկոլ Փաշինյանը, մեկնաբանելով Տեղ-Կոռնիձոր հատվածում 12 կմ-անոց հատվածը, հայտնել էր, որ Հայաստանի և Ադրբեջանի սահմանապահների տեղակայման կետերի ճշգրտման ուղղությամբ աշխատանքների արդյունքում իրավիճակը որոշակիորեն բարելավվել է։
