Հայաստանի պաշտպանության նախարարությունը հերքում է օտարերկրյա և հայկական մի շարք լրատվամիջոցներում տարածված լուրը, թե Հայաստանը ռուսական հրթիռներ կմատակարարի Ուկրաինային,«Արմենպրեսի» հարցին ի պատասխան ասել է ՀՀ ՊՆ մամուլի քարտուղար Արամ Թորոսյանը։
Մասնավորապես, ռուսական «Рыбарь» հեռագրային ալիքը և ադրբեջանական լրատվամիջոցները հայտնել են Երևանի կողմից ռուսական արտադրության «Точка У» հրթիռների հնարավոր տեղափոխման մասին։
«Տվյալ տեղեկությունը չի համապատասխանում իրականությանը և հայաստանյան ԶԼՄ գործընկերներին կոչ ենք անում օտարերկրյա քարոզչական աղբյուրների՝ լրատվադաշտ նետած կեղծ թեզերը չշրջանառել»,- ասել է Թորոսյանը։
ՊՆ մամուլի քարտուղարը հավելել է, որ համապատասխան ստորաբաժանումը մշտադիտարկում է ոլորտին առնչվող մամուլի հրապարակումները և մեկնաբանում կամ դրանց արձագանքում է ըստ անհրաժեշտության ու նպատակահարմարության:
Նոյեմբերի 20-ին ռուսական հեռագրային ալիքները և ադրբեջանական լրատվամիջոցները տեղեկատվություն են տարածել Ուկրաինա ռուսական արտադրության զենքեր փոխանցելու հայկական կողմի մտադրության և Երևանի կողմից ՀԱՊԿ-ից դուրս գալու փաստաթղթերի նախապատրաստման մասին։
«Рыбарь» հեռագրային ալիքը եզրակացրել էր, որ զենքի տեղափոխման շուրջ հնարավոր պայմանավորվածությունը ձեռք էր բերվել Հայաստանի Անվտանգության խորհրդի քարտուղար Արմեն Գրիգորյանի և Ուկրաինայի նախագահի գրասենյակի ղեկավար Անդրեյ Երմակի հանդիպման ժամանակ։
Հիշեցնենք, որ Գրիգորյանն ու Երմակը հանդիպել էին հոկտեմբերի 28-ին՝ Մալթայում։ Երմակը հաստատել էր ուկրաինական կողմի հանձնառությունը Հայաստանի հետ համագործակցության ամրապնդման հարցում, մասնավորապես՝ եվրաինտեգրման հարցերում։
