44-օրյա պատերազմի հանգամանքներն ուսումնասիրող Ազգային ժողովի հանձնաժողովը, որի լիազորությունների ժամկետը լրանում է դեկտեմբերին, մինչ այժմ, բացի իր ղեկավար Անդրանիկ Քոչարյանի հնչեղ հայտարարություններից, որևէ բացահայտում չի արել, գրում է «Ժողովուրդ»-ը։
Հրապարակման մեջ նշվում էր, որ հանձնաժողովը ստեղծվել է 2022 թվականի փետրվարի 10-ին «Քաղաքացիական պայմանագրի» նախաձեռնությամբ, «և պատերազմի հանգամանքների քննություն իրականացնում են իշխանությունները և նրա արբանյակ քաղաքական ուժերի ներկայացուցիչները, որոնք չեն կարող որևէ դեպքում Նիկոլ Փաշինյանին՝ որպես գերագույն գլխավոր հրամանատարի մեղադրել»: Ընդդիմադիր ուժերը հրաժարվել են մասնակցել հանձնաժողովի աշխատանքներին:
Թերթը հիշեցրել է, որ հանձնաժողովի գործունեությունն արդեն երկու անգամ երկարացվել է՝ 2022 թվականի հոկտեմբերի 5-ին և 2023 թվականի մայիսի 3-ին։ Միաժամանակ, «Ժողովուրդ»-ը տեղեկացրել է, որ «Ազգային ժողովի կանոնակարգ» օրենքի 20-րդ հոդվածի համաձայն՝ քննչական հանձնաժողովի լիազորությունների ժամկետը վեց ամիս է, իսկ հանձնաժողովի առաջարկով կարող է երկարաձգվել երկու անգամ, իսկ Ազգային ժողովի որոշմամբ՝ մինչև վեց ամիս։ Հանձնաժողովի աշխատանքը վեց ամսով երկարաձգվել է երկրորդ անգամ, այսինքն՝ այլևս երկարաձգվել չի կարող։
Աղբյուրը հիշեցրել է, որ «Հայաստան» խմբակցության քարտուղար Արծվիկ Մինասյանը նոյեմբերի 16-ին Ազգային ժողովում Քոչարյանի ղեկավարած հանձնաժողովին մեղադրել էր ապօրինի գործունեության մեջ՝ պատճառաբանելով, որ հանձնաժողովի լիազորությունները սպառվել են օգոստոսի 11-ին։ Սրան Քոչարյանն արձագանքել է, թե «երկու տարի անընդմեջ հանձնաժողովի անդամները մեկ ամիս արձակուրդում էին, հետևաբար հանձնաժողովի գործունեության ժամկետը երկարաձգվում է մինչև դեկտեմբեր»։
«Հանձնաժողովի ժամկետը երկարացվել է երրորդ անգամ, ինչը օրենքի խախտում է, և ԱԺ նախագահ Ալեն Սիմոնյանն իրավունք չունի դա անել։ Այն, որ այս հանձնաժողովը ներկայումս գործում է, Սիմոնյանի բացթողումն է»,- նշում է թերթը։
«Ժողովուրդ»-ը նաև նշել է, որ 2019-ին ստեղծվել է մեկ այլ հանձնաժողով՝ 2016-ի ապրիլին տեղի ունեցած ռազմական գործողությունների հանգամանքներն ուսումնասիրելու համար, «որը նույնպես միայն ձևական է եղել և իրականում որևէ բացահայտում չի արել»։
