Ֆրանսիայի Գրենոբլ քաղաքում անցկացվող մեկ տասնյակից ավելի երկրների մշակույթների երկխոսության խաչմերուկում` DIVERCITES միջազգային փառատոնին այս տարի արդեն 5-րդ անգամ մասնակցելու է նաև Սևան համայնքը` ներկայանալով հինգ երիտասարդ կատարողներով: Այս մասին հայտնում են Սևանի համայնքապետարանից։
Սևանը կներկայացնի «ԳԱՄՄԱ» անունը կրող սևանցի երիտասարդների խումբը՝
Գ- Գուրգենը (հարվածային գործիքներ, վոկալ )
Ա- Արմենակը ( ստեղնաշարային գործիքներ)
Մ-Մերին (բաս կիթառ)
Մ- Մարիամը (վոկալ)
Ա- Արտյոմը (կիթառ, թառ)։
«Նրանք երկու ամսից ավելի միավորվել են երաժշտական ալիքի շուրջ և պատրաստվում են ներկայացնել հետաքրքիր և ինքնատիպ ծրագիր, որը քննություն կբռնի բազմազգ փառատոնում։ Փառատոնն անցկացվում է 2 տարին մեկ անգամ և կրում է DIVERCITES անվանումը: 2020 թվականին, պայմանավորված կորոնավիրուսային համավարակով, այն չանցկացվեց։ Տարեցտարի փառատոնը դառնում է ավելի ընդգրկուն և գրավիչ: Ինչպես նշել է Գրենոբլի քաղաքապետ Էրիկ Պիոլը, սա մի գեղեցիկ օրինակ է, որի միջոցով Գրենոբլը համերաշխությանն ուղղված միջազգային քայլեր է կատարում:
Խառնելով տարբեր երկրների մշակույթները` ստացվում է հիանալի արդյունք` երաժշտական մի նոր սինթեզ` համեմված տարբեր մշակույթների տարրերով։ Փառատոնն իր տեսակի մեջ լինելով եզակի և ինքնատիպ` նաև հավակնոտ է, որը փորձում է համադրումների միջոցով ստանալ մի նոր որակ: Նախորդ տարիների փորձը հուշում է, որ հերթական փառատոնին պետք է պատրաստվել հավուր պատշաճի, կարողանալ մյուս ժողովուրդների մշակույթին համադրել հայկականը, տարբեր երկրներ ներկայացնող երիտասարդների հետ ստեղծել բարեկամական հարաբերություններ: Այս փառատոնը ևս մեկ պատեհ առիթ է` ներկայացնելու մեր արժեքները, խոսելու Հայաստանի մասին, միաժամանակ՝ աշխարհին ներկայացնելու Սևանը: Սևանն այլևս դուրս է եկել իր փոքրիկ տնից, և յուրաքանչյուր նմանատիպ ձեռնարկ ազդակ է եվրոպական ընտանիքին ինտեգրվելու, մշակութային առավել մեծ սահմաններ գծելու համար»,-նշել է Սևան համայնքի ղեկավար Սարգիս Մուրադյանը։
Նշվում է, որ ապրիլի 8-ին կկայանա «ԳԱՄՄԱ» band-ի անդրանիկ համերգը Սևանի Բոհեմ արվեստանոց-թեյարանում, որտեղ հանդիսատեսին կներկայացվեն Գրենոբլում այս տարվա հուլիսին կայանալիք Դիվերսիտի երաժշտական փառատոնում «ԳԱՄՄԱ» band-ի կողմից գործիքավորված երաժշտական համարներ:
