ՌԴ հայերի միությունը հայտնել է Մոսկվայում «Ոսկե նուռ» փառատոնի անցկացման մասին

Նոյեմբերի 11-ին Մոսկվայում, Ազգային տնտեսական նվաճումների ցուցահանդեսում, (ВДНХ) տեղի կունենա «Ոսկե նուռ» փառատոնը, որը կազմակերպում է Ռուսաստանի հայերի միությունը՝ Ազգային գործերի դաշնային գործակալության (ФАДН) և Մոսկվայի կառավարության արտաքին տնտեսական և միջազգային կապերի վարչության աջակցությամբ, հայտնում է ՌԴ հայերի միությունը։

«Հայաստան» տաղավարի այցելուներին այդ օրն սպասվում է․

1. Բազմազան մշակութային ծրագիր 13.00-17.00։ Իրենց ստեղծագործությունները կներկայացնեն պարային և վոկալ խմբեր, ժողովրդական երաժշտության տաղանդավոր կատարողներ և գործիքավորողներ։

2. Նուռ նկարելու վարպետության դասեր։

3. Թեմատիկ ցուցահանդեսներ։

Եվ, իհարկե, հյութալի նռան հյուրասիրություն։

Բիզնես ծրագրի շրջանակներում մասնակիցները կկարողանան կիսվել Մոսկվայի և Երևանի միջև հարաբերությունների զարգացման գործում հասարակական կազմակերպությունների մասնակցության վերաբերյալ իրենց գաղափարներով և առաջարկներով։

Միջոցառմանն ավանդաբար մասնակցում են Ռուսաստանի և Հայաստանի կառավարական մարմինների ղեկավարներ և ներկայացուցիչներ, սփյուռքի հայտնի ներկայացուցիչներ, հասարակական կազմակերպություններ, ուսանողներ, մշակույթի գործիչներ։

«Ոսկե նուռ» փառատոնը Ռուսաստանի մայրաքաղաքում նշվում է 2005 թվականից։