Արտերկրից Հայաստան դրամական փոխանցումների ծավալը կրկնապատկվել է․ ԿԲ

Արտերկրից Հայաստան դրամական փոխանցումների ընդհանուր ծավալը 2022 թվականին կրկնապատկվել է։ Այս մասին են վկայում ՀՀ կենտրոնական բանկի տվյալները։

Ըստ ԿԲ տվյալների՝ 2022 թվականի 10 ամիսների ընթացքում արտերկրից Հայաստան է փոխանցվել 4,1 մլրդ դոլար, մինչդեռ 2021 թվականին դրամական փոխանցումների ընդհանուր ծավալը կազմել է 2,1 մլրդ դոլար։

Նշվում է, որ Հայաստանում ֆիզիկական անձանց կողմից առևտրային բանկերի միջոցով ստացված դրամական փոխանցումների ծավալը 2022 թվականի հոկտեմբերին կազմել է 618,1 մլն դոլար, սեպտեմբերին՝ 551,6 մլն դոլար։

Միաժամանակ, հոկտեմբերին կատարված փոխանցումների ընդհանուր ծավալից ամենաշատ փոխանցումները կատարվել են Ռուսաստանից՝ մոտ 483 մլն դոլար (սեպտեմբերին՝ 416,1 մլն դոլար), իսկ ԱՄՆ-ից՝ 58,4 մլն դոլար (սեպտեմբերին՝ 58,8 մլն դոլար)։