ՌԴ վարչապետ Միխայիլ Միշուստինը հայտարարել է, որ կատարել է Վերին Լարսի վերաբերյալ իր խոստումները, որոնք տվել է իր հայ գործընկեր Նիկոլ Փաշինյանին, փոխանցում է TACC-ը։ Այս մասին Միշուստինը խոսել է այն բանից հետո, երբ Դաշնային մաքսային ծառայության ղեկավարի պաշտոնակատար Ռուսլան Դավիդովը զեկուցել է նրան, թե ինչպես են իրենք բարելավում անցակետերի աշխատանքը։ Դավիդովի խոսքով, այն վայրերում, որտեղ երթևեկությունը դժվար է, ինչպես Վերին Լարսում, լրացուցիչ հարթակներ են ստեղծվում։
«Այս մասին հարցրեց ՀՀ վարչապետ Նիկոլ Վովաևիչ Փաշինյանը։ Մենք Սոչիում նրան տվել ենք համապատասխան խոստումներ, որոնք խստորեն կատարվել են»,- ընդգծել է ՌԴ նախարարների կաբինետի ղեկավարը։
Դավիդովը ՌԴ վարչապետին պատմել է նաև Վերին Լարսում համատեղ աշխատանքի առաջընթացի մասին։ «Հայ գործընկերները մեզ օգնում են նաև համակարգել աշխատանքը վրացի գործընկերների հետ, որոնց հետ, մասնավորապես, պայմանավորվում ենք, թե ինչպես մեքենաները միմյանց հանձնել հսկողության»,- ասել է նա:
Միշուստինը դա անվանել է «առողջ համագործակցություն»։ «Առաջին հերթին պետք է մտածել այն մարդկանց մասին, ովքեր տուժում են, եթե նման մեխանիզմները չեն գործում, հերթ են կանգնում։ Իսկ գործարարները փող են կորցնում»,- եզրափակել է ՌԴ վարչապետը։
Միշուստինը հունիսի 7-ին Եվրասիական միջկառավարական խորհրդի և ԱՊՀ կառավարությունների ղեկավարների խորհրդի նիստի շրջանակում Փաշինյանին խոստացել է վերացնել Վերին Լարսի հերթերը։ Ավելի վաղ ՀՀ փոխվարչապետ Մհեր Գրիգորյանը հայտնել էր, որ Վերին Լարսի անցակետով երթևեկության գոտիների թիվը 11-ից հասել է 39-ի, իսկ բեռնատարների առավելագույն հոսքը օրական 300-ից դարձել է 1 400 տրանսպորտային միջոցի։
2022 թվականի հուլիսին ռուսական կողմի Վերին Լարս անցակետում բացվել են մարդատար ավտոմեքենաների համար նախատեսված 12 լրացուցիչ երթևեկության գոտիներ, ինչը հնարավորություն է տվել զգալիորեն մեծացնել անցակետի թողունակությունը։
