Առաջին փուլում տեղափոխվելու են 4 բուհեր՝ Կրթական, Տեխնոլոգիական, Արվեստի և Սպայական համալսրանները, երկրորդ փուլով՝ դասական և բժշկական համալսարանները, ԱԺ-ում հայտարարել է ԿԳՄՍ նախարար Ժաննա Անդրեասյանը՝ պատասխանելով ծրագրի վերաբերյալ նախարարության ներկայացրած ժամկետների մասին հարցին։
Ըստ նախարարի՝ 2029թ․ առաջին շենքերը կլինեն «Ակադեմիական քաղաքում», «առաջին գործառույթները կսկսեն իրականացվել և փուլային սկզբունքով մեծ ծավալի աշխատանքն իր տրամաբանական ընթացքով կգնա»։
««Ակադեմիական քաղաքի» հայեցակարգը ստեղծված է, «Ակադեմիական քաղաք» հիմնադրամ է ստեղծված, որը ծրագրի ամբողջ նախապատրաստման, իրականացման, հետագա կառավարման գործընթացների պատասխանատուն է, արդեն իսկ քննարկման է ներկայացված բարձրագույն կրթության և գիտության օրենքի նոր նախագիծը, որում «Ակադեմիական քաղաքի» օրենսդրական ստեղծումը տեղադիրքի իմաստով և կարգավորումների իմաստով նույնպես նախատեսված է։ Բուն ծրագրի իրականացման գործըթնացը սկսված է։ Կարծում եմ՝ այդ ժամանակը բավարար է, որ մենք մեր պլանավորած աշխատանքներն իրականացնենք»,- ասել է նա։
ՀՀ վարչապետ Նիկոլ Փաշինյանը 2022 թվականի սեպտեմբերի 1-ին հայտարարել էր կրթության ոլորտի բարեփոխումների մասին, որոնց շրջանակներում Հայաստանում կստեղծվի ութ խոշորացված բուհ՝ պետության ամբողջական ֆինանսավորմամբ։ Նա տեղեկացրել էր, որ կկառուցվի «Ակադեմիական քաղաք», որտեղ կտեղակայվեն բոլոր 8 բուհերը։ 2023 թվականի հոկտեմբերի 19-ին Կրթության նախարարը հայտնել էր, որ «Ակադեմիական քաղաքի» բացումը նախատեսված է 2030 թվականի հունվարին։
Հուլիսի 9-ին Անդրեասյանը հայտարարել էր, որ «Ակադեմիական քաղաքի» կառուցումը խոշորածավալ ծրագիր է, որի ընդհանուր արժեքը կկազմի մի քանի տրիլիոն դրամ։ Ըստ նրա՝ առաջին փուլով «Ակադեմիական քաղաքում» աշխատելու և բնակվելու է մոտ 44 000 մարդ: