Իջևանի ոստիկանների ձեռնարկած միջոցառումների արդյունքում սեպտեմբերի 5-ին պարզվել է, որ օգոստոսի 31-ին, ժամը 09.00-ի սահմաններում, Երևանյան փողոցի 73-ամյա բնակիչը տան հետնամասում վառել է փայտածուխի պատրաստման տարայի մեջ եղած փայտը, ինչի հետևանքով հրդեհ է առաջացել, որը տարածվել է դեպի հարակից անտառ:
Այս մասին հայտնում է ՀՀ ոստիկանության մամուլի ծառայությունը՝ նշելով, որ 73-ամյա տղամարդը փորձել է հանգցնել բռնկված կրակը, սակայն չի կարողացել, ինչից հետո զանգել է 911 ծառայություն:
Այրվել է մոտ 12 հեկտար տարածք: Կազմված փատաթղթերն ուղարկվել են Տավուշի մարզային քննչական վարչություն:
Նշենք, որ հրդեհը մինչ այսօր չի հաջողվել մարել:
Ավելի վաղ Armenia Today-ը հայտնել էր, որ օգոստոսի 31-ին, ժամը 13.30-ին, ԱԻՆ հրշեջ փրկարարական ծառայությունից ոստիկանության Իջևանի բաժին հաղորդում էր ստացվել, որ Իջևան համայնքի «Գինու գործարանի» հարակից տարածքում չոր խոտածածկ տարածք է այրվում:
