Ազատ գյուղի զորանոցում 15 զինծառայողների մահվան դեպքով հունիսի 11-ին իրականացված քննչական գործողությունների արդյունքները տուժող կողմի մոտ հարցեր են առաջացրել, ասել է մահացած զինվորների հարազատների փաստաբան Նորայր Նորիկյանը։ Նա հավելել է, որ ծագած հարցերը հակասության մեջ են մտել քննչական այլ միջոցառումների ընթացքում ձեռք բերված փաստերի հետ։ Փաստաբանը մանրամասներ չի հայտնել։
«Զոհվածների ծնողները չեն հավատում պաշտոնական վարկածին և չեն բացառում այլ վարկածներ, այդ թվում՝ իրենց երեխաների դիտավորյալ սպանությունը։ Նրանք նաև ընդունում են, որ հրկիզումը կատարվել է որոշ հետքեր կոծկելու և հասարակության ուշադրությունն իրական հանցագործությունից շեղելու համար»,- ասել է Նորիկյանը։
Զոհված զինվորների ծնողները կձգտեն ամբողջությամբ բացահայտել այս հանցագործության իրական հանգամանքները և պատասխանատվության ենթարկել բոլոր մեղավորներին, հավելել է փաստաբանը։
Գեղարքունիքի մարզի Ազատ գյուղի ինժեներասակրավորային վաշտի կացարանում հրդեհ էր բռնկվել հունվարի 19-ի գիշերը, ինչի հետևանքով 15 զինծառայող է զոհվել։ Քննիչները հայտնել էին, որ հրդեհի պատճառ է հանդիսացել սպայի կողմից ջեռուցման համար բենզինի օգտագործումը, գլխավոր դատախազությունը հաստատել էր այս վարկածը և քրեական գործ հարուցել ՀՀ ՊՆ N զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գ.Ա.-ն իր ծառայողական պարտականությունների կատարման նկատմամբ անբարեխիղճ և անփույթ վերաբերմունքի հետևանքով իր պարտականությունները չի կատարել:
Մեղադրանք է առաջադրվել նաև կոմունալ ծառայության, հրշեջ անվտանգության և փրկարարական աշխատանքների ղեկավար, մայոր Մ.Ս.-ին, որը հունվարի 31-ին բերման է ենթարկվել։ Փետրվարի 9-ին Գեղարքունիքի մարզի Ազատ գյուղի զորամասի ինժեներական վաշտի հրամանատար Գ.Մ.-ի նկատմամբ քրեական հետապնդում է հարուցվել Քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութությունը, որն անզգուշությամբ առաջացրել է մարդու մահ: Նշված հոդվածի 3-րդ մասով կատաված արարքը պատժվում է ազատազրկմամբ՝ հինգից տասը տարի ժամկետով:
